Səhiyyə şöbəsində qazini müayinə ediblər və əməliyyata ehtiyacı olduğunu bildiriblər
Bu yaxınlarda "Azadlıq”a müraciət etmiş Sumqayıt şəhər sakini, Daşaltı döyüşlərində 28 güllə yarası almış, Ağdam morquna yerləşdirilərək, sonradan dirilmiş, I qrup Qarabağ qazisi Məcidov Malik Qardaş oğlu bildirirdi ki, mədə və bədənində olan qəlpə yaralarının törətdiyi fəsadla bağlı bir neçə dəfə Iran Islam Respublikasının xəstəxanalarında müalicə olunmasına baxmayaraq kəskin ağrılardan hələ də əziyyət çəkir.
Yazıda Sumqayıt şəhər Icra Hakimiyyətinin keçmiş başçısı Vaqif Əliyevin dönəmində Əmək və Əhalinin Sosial Müdafiəsi Nazirliyi tərəfindən M.Məcidova veriləcək evi qarşılıqlı anlaşma nəticəsində satıldığı deyilirdi.
M.Məcidov illərlə ev davası etməsinə baxmayaraq heç nəyə nail ola bilməmişdi. O, dəfələrlə Sumqayıt IH başçısı (artıq keçmiş – red.) Eldar Əzizovun qəbuluna yazılsa da, başçı onu qəbul etməmişdi. O, bundan sonra intihara əl atmışdı. Üstündə gəzdirdiyi plastik qabda olan benzini üzərinə tökərək od vurmaq istəmişdir.
Sumqayıt Icra Hakimiyyətinin mühafizə edən polislər tərəfindən bədbəxt hadisənin qarşısı alınmışdı. Hadisədən xəbər tutan Sumqayıt IH başçısı E.Əzizov Qarabağ qazisi M.Məcidovu Sumqayıt şəhər Ruhi Əsəb Dispanserində məcburi qaydada 10 günlüyə "müalicə”yə göndərmişdi.
Yazıda daha sonra bildirilirdi ki, Malik Məcidovun işlədiyi Sumqayıt şəhər Işıq idarəsində 6 aylıq əmək haqqını ala bilmir. Daha sonra onun müvəqqəti yaşadığı ünvana bildiriş göndərərək bildiriblər ki, onun 200 manatlıq maaşı 50% azaldılmışdır.
Malik Məcidovun Sumqayıt şəhər Səhiyyə Şöbəsindən də şikayəti əks olunmuşdu. Yazıda ona qarşı laqeydlikdən də bəhs edilirdi. Qarabağ qazisinin şikayətinin "Azadlıq”da dərcindən sonra Sumqayıt şəhər Səhiyyə Şöbəsinin müdiri Ələkbər Tağıyev (məşhur bəstəkar Ələkbər Tağıyevin nəvəsi) M.Məcidovu Səhiyyə Şöbəsinə dəvət edərək konsilium keçirib, bütün epikrizləri toplatdıraraq onun cərrahi əməliyyatının yalnız özəl klinikalarda (Neftçilər xəstəxanası və ya Mərkəzi klinikada) mümkün olduğunu bildirib.
Hazırda onun hansı klinikada əməliyyat olunacağı barədə Sumqayıt şəhər Səhiyyə Şöbəsində müzakirələr aparılır.
Xəbərdən istifadə edərkən istinad etmək vacibdir.
