Səhra da ucsuz -bucaqsız, küləklər də şiddətli,günəş də amansız idi... Lap tale kimi....

Sumqayıtın Tarixinə ilk nəzər məhz bu sözlərlə başlayır..5dəqiqə 34saniyə. .ecazkar səs. .bu müddət ərzində bizə bir əfsanə danışır. .bir şəhərin yaranması haqqında əfsanə...

Sumqayıt Dövlət Musiqili Dram Teatrında tamaşa idi. 2012-ci il olardı səhv etmirəmsə. İşdən çağırmışdılar. Mütəmadi olaraq tamaşaları izləyir, böyük zövq alırdım. "Sən Həmişə MƏNİMLƏSƏN" tamaşasına ilk kəs onda baxdım. Çox sevdiyim, dönə dönə baxaraq doymadığım tamaşada baş rolun ifaçısı hündürboylu, enlikürəkli orta yaşlı kişi öz ifası ilə məni yaman təsirləndirdi. Deyəsən bura aktyoru deyildi, ilk dəfə idi görürdüm. Adətim üzrə hər tamaşadan sonra səhnə arxasına keçib bir-bir aktyorlarla görüşüb onları təbrik edir, öz təəsüratlarımı bölüşürdüm. Bu dəfə də, şəkil çəkdirənlərdən, təbrik edənlərdən sonra mənim görüşmək növbəm həmin o aktyora çatdı. Çəkinərək ilk dəfə gördüyüm insana ehtiyatla əl uzatdım :
-Təbrik edirəm sizi, çox gözəl ifa etdiz rolunuzu! Məmnun qaldıq!
Əlimi mehribancasına sıxaraq gur səslə razılıq etdi:
- Çox sağ olun! Siz sağ olun ki, gəlib baxdınız!
- Mən özümü təqdim edim icazə verin... Kərimov Aydın, mədəniyyət işçisiyəm elə özüm də. Sumqayıtın Tarixi Muzeyində işləyirəm.
-Boooooy! Nə gözəl! Mən də orda varam!
-Necə? sizin də arxiviniz var? Adınız?
-Bəs əfsanəni mən səsləndirirəm də!
Sevinclə az qala qışqıracaq halda :
-İlham Müəllim!!!
Görüşüb qucaqlaşdıq. ..Özümü itirmişdim, qarşımda xalq artisti vardı...
-İgidin.....
Dilim dolaşdığından sözümü tamamlaya bilmədim..
-İgidin səsini eşit üzünü görmə hə? (Zarafatına özü də qəhqəhə ilə güldü )
-Bəli (Gülərək cavab verdim)
Yenə də qucaqlaşdıq. Şəkil çəkdirdik. Ayrılarkən dedi :
-Məndən muzeyin kollektivinə, Olya xanıma çoxlu çoxlu salam de. .
-Baş üstə! Mütləq deyərəm!

İşə gəldim..Sevinc hissi ilə hamiya "İlham Əsgərovu gördüm e,salam deyirdi" dedim.

Dünya belədir... Xalq artisti artıq dünəndən bəri cismən həyatda yoxdur... Amma o var. O ölməyib. O hələ nə qədər uşaqlara, böyüklərə, turistlərə Sumqayıtın Tarixi haqqında əfsanəni oxuyacaq! Ölümündən sonra da tarixini yaşadacaq, təbliğ edəcək...

-Sumqayıtın Tarixi Muzeyinə Xoş gəlmişsiniz! Bu gün siz bu muzeydə Sumqayıt şəhərinin tarixini, yaranmasını, inkişafını özündə əks etdirən məlumatlarla tanış olacaqsınız! İlk öncə isə gəlin Azərbaycan Respublikasının Xalq artisti İlham Əsgərovun ifasında Sumqayıt haqqında əfsanəni dinləyək!

Səhra da ucsuz -bucaqsız, küləklər də şiddətli, günəş də amansız idi..Lap tale kimi....


Aydın Şahid