"Sumqayıt şəhər müşavirəsində yeni təyin olunmuş icra hakimiyyətinin başçısı Zakir Fərəcovun bələdiyyənin işi ilə bağlı  səsləndirdiyi iradlarla tam razıyam. Həqiqətən də Zakir Fərəcovun 11 il əvvəl qoyub getdiyi bələdiyyədən əsər əlamət qalmayıb. Bu illər ərzində demək olar ki, heç bir sosial layihə həyata keçirilməyib. Məhəllədaxili yollar bərbad vəziyyətdədir.Sumqayıt bələdiyyəsinin sakinlər arasında heç bir nüfuzu yoxdur."

Bu sözləri Xeberle.com-a açıqlamasında Sumqayıt bələdiyyəsinin keçmiş üzvü, politoloq Vasif Əfəndi bildirib. V. Əfəndi qeyd edib ki, Sumqayıt bələdiyyəsinin ilk üzvlərindən biri kimi Zakir Fərəcovun dediklərinə qoşulur. Keçmiş bələdiyyə üzvü onu da vurğulayıb ki, 1999-2005- ci illərdəki bələdiyyənin nüfuzundan əsər əlamət qalmayıb. Onun sözlərinə görə, ilk növbədə Sumqayıt bələdiyyəsinin nüfuz sahibi olmasının səbəbi Fərəcov kimi bacarıqlı dövlət adamının işgüzarlığı olub: "Həmin illərdə Sumqayıt bələdiyyəsinin gördüyü işlər barədə statistik məlumatlar da verə bilərəm. Açığını deyim ki, Fərəcovun Sumqayıtdan Abşeron rayonuna getməsini təəssüflə qarşılayanlardan biri də mən olmuşam.Çox yaxşı ki, Zakir müəllim yenidən Sumqayıta qayıtdı.Fərəcov Sumqayıtın sosial-iqtisadi inkişafında böyük dönüş yaratmaq iqtidarındadır. Bu işdə ona yalnız uğurlar arzulamaq istəyirəm. "