Respublikanın əməkdar jurnalisti Eyruz Məmmədov tanınmış qələm sahibidir. O, 27 ildir ki, 1988-ci ilin fevral ayında, Sumqayıtda baş verən hadisələrin tədqiqatı ilə məşğuldur. Onun «28-dən 29-na keçən gecə», «Erməni təxribatı», «Ermənilərin Sumqaytda qanlı aksiyası», «Cinayət və cəza» (Ramazan Məmmədovla birlikdə) və sair kitabları çap olunmuşdur. Bir neçə sənədli filmin ssenari müəllifidir.

Eyruz Məmmədov həm də bədii yaradıcılıqla məşğuldur. Onun əsərləri türk, rus, alman, ingilis, ispan dillərinə tərcümə olunmuşdur. Bu yaxınlarda onun «Azəri» nəşriyyatı tərəfindən «Mister Riç» adlı yeni romanı çapdan çıxmışdır. Romanda iki gəncin həyatından və saf məhəbbətindən bəhs olunur. Bu məhəbbətin yolları heç də hamar deyil. Gənclər müxtəlif problemlərlə üzləşir, həyatın qarşılarına çıxartdığı amansız oyunların məngənəsində sıxılsalar da, ümidlərini itirmirlər. Sevgi və eşq gəncləri ruhdan düşməyə qoymur və onlar itirilməkdə olan məhəbbətlərinin dalısıyca qaçır, onu qaytarmağa çalışırlar…

Onu da qeyd edək ki, «Azəri» nəşriyyatı Eyruz Məmmədovun altı cildlik kitabını çap etmişdir. («Mister Riç»lə birlikdə) Bura müxtəlif illərdə yazılmış «Bir…iki…üç… və yaxud Dağ çiçəyi», «Anata», «Gecə…incə gecə…», «Dama Pika», «P.S.» romanları daxildir.

Kitabsevərlərin nəzərinə çatdırmaq istəyirik ki, Eyruz Məmmədovun kitablarını əldə etmək üçün Sumqayıt şəhər məpkəzi kitabxanasına və Bakının kitab mağazalarına müraciət edə bilərlər.