Sumqayıt Şəhər İcra Hakimiyyətinin başçısı Zakir Fərəcov Sumqayıtda 8-ci mikrorayonda fəaliyyət götərən və camaat arasında "ucuz bazar" kimi tanınan kənd təsərrüfatı məhsulları yarmarkasını bağlayıb. Buna səbəb icra başçısının yarmarkanın mövcud durumundan, təmizlik və təmir səviyyəsindən narazı qalması olub.

Qeyri-müəyyən vaxta qədər fəaliyyəti dayandırılan yarmarka ərazisində əsaslı təmir işlərinin görüləcəyi, təmizlik-sanitariya baxımından yenidən qurulacağı planlaşdırılır.

Yarmarka ərazisində təmir prosesi başa çatana qədər sözügedən yarmarkanın Hacı Zeynalabdin qəsəbəsində fəaliyyət göstərməsi qərara alınıb. Lakin yarmarkanın müvəqqəti olaraq Hacı Zeynalabdin Tağıyev qəsəbəsində fəaliyyət göstərəcəyi ilə bağlı qərar əksər şəhər sakininin ürəyincə olmayıb. Belə ki, şəhərin mərkəzində fəaliyyət göstərən yarmarkanın şəhər kənarına köçürülməsi praktiki olaraq əksər vətəndaşları bu yarmarkadan faydalanmaq imkanından məhrum edib. Vətəndaşlar hesab edir ki, təmir prosesinin tezliklə başa çatdırılması və yarmarkanın əvvəki yerində açılışı daha arzuediləndir. (moderator.az)