"Sülh” küçəsində park edilən avtomobillər yığışdırılsa da, sürücülərin əksəriyyəti avtomobillərini H.Əliyev prospektində saxladılar

Bu gün səhər saatlarından başlayaraq Sumqayıt şəhər Yol Polisi idarəsinin əməkdaşları Azərbaycan, M.Ə.Sabir və Sülh küçələrində əməliyyat tədbirləri həyata keçirməyə başlayıblar. İdarə əməkdaşları Sülh küçəsi boyunca yol kənarında park edilən avtomobillərin ərazidən çıxarılması üçün göstəriş veriblər. Redaksiyamıza daxil olan məlumata görə, hətta bəzi avtomobillər evakuator vasitəsilə sözügedən küçədən uzaqlaşdırılıb.

Xeberle.com əməkdaşları olaraq aparılan əməliyyat tədbirini yaxından izləmək məqsədilə Sülh küşəsinə yollandıq. Biz əraziyə çatanda Yol Patrul xidmətinin əməkdaşları iş başında idilər. Əvvəlcə qeyd edək ki, küçə boyunca park edilən avtomobillər ərazidən uzaqlaşdırmışdı. Tək-tük avtomobillər gözə dəyirdi. Güman ki, sahibləri yeni qadağadan xəbərsiz idilər. YPX əməkdaşları avtomobilinizi yoldan çıxarın tələbi ilə onlara müraciət edəndə bəziləri çaş-baş qaldılar.

Onu da qeyd edək ki, Sülh küçəsində park edilməsinə icazə verilməyən avtomobillərin bu dəfə Heydər Əliyev prospektində yol boyu düzüldüyünün şahidi olduq.

Sumqayıt şəhər Yol polisi idarəsinin apardıqları əməliyyat tədbirləri hələ də davam edir. Belə görünür ki, YPX əməkdaşları gün ərzində reydlərini davam etdirəcəklər.

Aytən Əli, Xeberle.com