"Mən Naxçıvanda orta məktəbdə oxuyanda nəfəsli orkestrdə klarnet ifa edirdim.Bizim ansamblın repertuarında Sumqayıt mahnısı tez- tez ifa olunurdu. O vaxt bizim orkestrin solisti, sonralar respublikanın əməkdar artisti olan mərhum Yaşar Səfərov bu mahnını yaxşı ifa edirdi. Mahnı məndə də bu şəhərə maraq yaratmışdı. Tale elə gətirdi ki, ali məktəbi bitirdikdən sonra bu şəhərə öz istəyimlə gəldim. O vaxt mən Sumqayıta gələndə şəhərin demək olar ki, yarı hissəsi tikilmişdi. Şəhər 34-cü məhəllədə qurtarırdı. Bütün mikrorayonlar mənim gözümün qabağında tikildi. Zavodlar, məktəblər, mədəniyyət evləri, kinoteatrlar inşa olundu...”

Bəli, illər ötüb. Artıq Sumqayıt özünün 66-cı çiçəklənən baharını yaşayır: Hündürmərtəbəli binalar, göz oxşayan parklar, müasir tələblərə cavab verən yüksək texnologiyalarla təmin olunmuş istehsalat müəssisələri və daha nələr...

Artıq məqaləmin qəhrəmanı, haqqında söz açacağım Prezident təqaüdçüsü, Sumqayıtın ictimai – sosial həyatında iz qoymuş Natiq Qulubəyovun xatirələrində qalan o Sumqayıtdan əsər - əlamət yoxdur. Bəli, Sumqayıtın İnkişafında Natiq Abdulla oğlu Qulubəyovun da özünəməxsus xidmətləri var. 1939-cu il fevral ayının 23-də Naxçıvanda anadan olan Natiq Qulubəyov orta təhsilini Ordubadda almışdır. Orta məktəbi qızıl medalla bitirən Natiq Qulubəyovun arzusu musiqi sahəsi üzrə ali təhsil almaq idi. Amma Azərbaycan Sənaye İnstitutunun tələbələrinin xüsusi formasını görəndən sonra, onda bu sahəyə həvəs daha da artdı. 1956-1962-ci illərdə Azərbaycan Neft və Kimya İnstitutunun " İstehsal proseslərinin avtomatlaşdırılması " fakultəsində təhsil almışdır. Universiteti bitirdikdən sonra təyinatla Sumqayıtdakı Sintetik Kauçuk zavoduna işləməyə göndərilmişdir. Nəzarət ölçü və avtomatika sexində fəhlə vəzifəsində ilk fəaliyyətinə başlayan Natiq Qulubəyov pillə - pillə yüksələrək sex rəisi vəzifəsinə gəlib çatmışdır. Onun haqqında məlumatlar toplayarkən iş mühiti ilə yanaşı apardığı ictimai- sosial fəaliyyət diqqətimi daha çox cəlb etdi.

Özünün xatirələrindən: " 1974-cü ildə məni partiya işinə irəli çəkdilər. Bu elə də təsadüfi olmadı. Çünki , həmin vaxta qədər ictimai işlərdə çalışmışdım. Sex Komsomol Təşkilatının katibi, Zavod Komsomol Təşkilatının müavini, Sex Komsomol Təşkilatının müavini, Sex Partiya Təşkilatının katibi, Zavod Partiya Komitəsinin müavini kimi işlərdə işləmişdim.” 1974-cü ildən Sintetik Kauçuk Zavodu Partiya Komitəsinin katibi seçilən Natiq Qulubəyov üç çağırış Şəhər Sovetinin deputatı olmuşdur. SK Partiya Komitəsinin katibi olarkən müəssisəsi iki dəfə keçmiş İttifaqda keçirilən Sosializm yarışının qalibi olmuşdur. Moskvada keçirilən Xalq Təsərrüfatları nailiyyətləri sərgisində şəhərimizi təmsil etmiş, həmçinin Polşa, Ruminiya və digər xarici ölkələrdə təcrübə mübadilələrində olmuşdur. 1983-cü ildən 2000-ci ilə kimi "Azərkimyatəmir” trestində müdir müavini işləmişdir.2000-ci ildə təqaüdə çıxan Natiq Qulubəyovun xidmətləri hər zaman yüksək qiymətləndirilmişdir. Respublika Ali Soveti Rəyasət heyətinin , Sumqayıt Şəhər Partiya Komitəsinin fəxri fərmanları, Əmək veteranı medalı, Lenin Yubiley medalı ilə təltif olunmuşdur. Azərbaycan Respublikası prezidenti İlham Əliyev xidmətlərini yüksək qiymətləndirərək onu prezident təqaüdünə layiq görmüşdür. Həyatda bütün təsadüflər zərurətdən doğur. Məktəbdə oxuyarkən musiqiyə olan həvəsi Natiq Qulubəyovu nəfəsli orkestra, orkestrda ifa olunan Sumqayıt mahnısı isə həyatını bağladığı,canından çox sevdiyi bu şəhərə gətirib çıxartdı...

Aydın Kərimov

Sumqayıtın Tarixi Muzeyinin ekskursiya aparıcısı