Bir neçə gün əvvəl məlum oldu, Sumqayıt şəhər Təcili Tibbi Yardım Xəstəxanasının baş həkimi, "Şöhrət” ordenli Vaqif Qəhrəmanov işdən çıxarılıb. 

Bunu həmin vaxt onun yerinə baş həkim təyin olunan Rauf Sadıxov məlumat vermişdi. O bildirib ki, Vaqif Qəhrəmanov işdən öz istəyi ilə ərizə yazaraq çıxıb.

Qeyd edək ki, Rauf Sadıxov tanınmış həkim İzzət Sadıxovun oğludur. R. Sadıxov 2005-2011-ci illərdə Sumqayıt şəhər səhiyyə şöbəsinin müdiri vəzifəsində çalışıb. O, 2009-cu ildə prezidentin sərəncamı ilə "Tərəqqi” medalı ilə təltif edilib.

Qaynar.info-ya daxil olan məlumata görə isə, baş həkimin işdən azad edilməsində həlledici rolu Sumqayıt şəhərinə yeni icra başçısı təyin edilən Zakir Fərəcov oynayıb. Fərəcov V. Qəhrəmanova onunla işləmək istəmədiyini çatdırıb. Səhiyyə naziri isə "Şöhrət” ordenli baş həkimin işdən azad olunmasını istəməsə də, sonda yeni icra başçısının növqeyini nəzərə alaraq bununla bağlı əmri imzalamalı olub.

Qeyd edək ki, Zakir Fərəcov iki gün əvvəl şəhərin səhiyyə işçiləri ilə görüşündə sərt iradlar səsləndirib. Şəhər rəhbəri bəzi xəstəxanalarda hələ də xoşagəlməz və neqativ halların davam etdiyini vurğulayıb. 

Z. Fərəcov yoluxucu xəstəliklərin qarşısının alınması məqsədi ilə həkim müayinələri təşkil edilməsini, şəhər sakinlərinin ildə iki dəfə bu müayinədən keçməli olduğunu qeyd edib və bunu tibb işçiləri qarşısında bir tələb kimi qoyub.

Şəhər səhiyyə şöbəsinin müdiri Ələkbər Tağıyev çıxış edərək, səhiyyədə baş verən neqativ halların aradan qaldıracağına söz verib.

Əldə etdiyimiz məlumata görə, yeni icra başçısı əslində səhiyyə şöbəsinin müdiri ilə də işləməyə isti yanaşmır və mümkündür ki, onun vəzifəsindən azad edilməsi üçün Səhiyyə Nazirliyinə təqdimat yazsın. 

İlkin Hüseynli

Qaynar.info