Azərbaycanda Yerli Demokratiya həftəsinin başlanması ilə əlaqədar Sumqayıt Bələdiyyəsində şəhərin bir sıra məhəllə və mikrorayonlarında fəaliyyət göstərən məhəllə komitələri sədrlərinin iştirakı ilə geniş tədbir keçirilmişdir.

Sumqayıt Bələdiyyəsinin sədri professor Əbülfəz Babayev tədbiri açaraq, builki "Demokratiya həftəsinin” "Multikultural cəmiyyətdə həyat: hörmət, dialoq və qarşılıqlı fəaliyyət” adı altında keçirildiyini və bu tədbirin məhəllə və mikrorayon sakinlərinin qarşılıqlı qonşuluq, kollektivçilik münasibətlərinin səmimi və mehriban ünsiyyət, sivil cəmiyyət davranışı üzərində daha yüksək şəkildə formalaşmasında mühüm əhəmiyyət kəsb edəcəyini diqqətə çatdırmışdır.

Qeyd edilmişdir ki, Azərbaycanın müstəqil və sivil bir dövlət kimi demokratik prinsiplər və dəyərlər əsasında inkişafında xalqımızın ümummilli lideri, dahi rəhbər Heydər Əliyevin müstəsna rolu olmuşdur. Xalqların, millətlərin böyük bir cəmiyyət, bəşəri tələblər səviyyəsində formalaşmasında demokratiya prinsip və ənənələrinin mühüm əhəmiyyətə malik olduğunu diqqətə çatdıran Bələdiyyə sədri Azərbaycanda yaşayan bütün millətlərin dostluq, qardaşlıq, bir-birinin milli, dini adət-ənənələrinə qarşılıqlı hörmət şəraitində yaşadıqlarını, ölkəmizdə tolerantlığın hətta bütün qərb ölkələrinə nümunə olacaq dərəcədə yüksək səviyyədə olduğunu, bu dostluq, qardaşlıq münasibətlərinin möhkəmləndirilməsinində Ulu öndərin və onun layiqli davamçısı, ölkə başçısı İlham Əliyevin böyük xidmətləri olduğunu bildirmişdir.

Qeyd edilmişdir ki, Azərbaycan son illərdə ictimai həyatın bütün sahələrində sürətli inkişafa, yüksək uğurlara nail olmuşdur ki, bunun da əsasında dıgər mühüm amillərlə yanaşı demokratik ənənə və prinsiplərə diqqət və hörmətin böyük rolu vardır. Sumqayıtda da məhz demokratik prinsiplərin, insan amilinin əsas tutulmasının real nəticəsidir ki, bu gün şəhərin məhəllə və mikrorayonlarında də geniş vüsətlə abadlıq-quruculuq işləri aparılmaqdadır. Son günlərdə şəhərin ən ucqar məhəllə və mikrorayonlarından başlayaraq küçə və meydançalar, şəhərdaxili yollar yüksək keyfiyyətlə təmir edilir, park və istirahət güşələri yenidən qurulur, ictimai və yaşayış binaları milli və müasir memarlıq tələblərinə uyğun görkəmə salınır.

Ölkəmizdə artıq 8-ci ildir ki keçirilən "Yerli Demokratiya həftəsi”nin yeni, müasir vətəndaş cəmiyyətinin formalaşmasında, fəallığının artmasında rolu əsas tutularaq, tədbirdə məhəllə komitələri sədrlərinin əsas diqqəti builki "demokratiya həftəsi”nin proqramına uyğun olaraq Sumqayıtın əhalisinin daha sıx olan yaşayış sahələrində sakinlərlə görüşlərin yüksək səviyyədə, səmərəli təşkilinə, Milli Məclisə seçkilərin hazırlıq dövrü də nəzərə alınmaqla sakinləri narahat edən problemlərin diqqətlə öyrənilməsinə yönəldilmişdir. Xüsusi olaraq nəzərə çatdırılmışdır ki, "Yerli Demokratiya həftəsi”nin keçirildiyi bu günlərdə Bələdiyyə-vətəndaş münasibətlərində qarşılıqlı anlaşma təmin edilməli, hər bir mikrorayon və məhəllə sakininin, hər bir ailənin müraciət və təkliflərinin dinlənilməsinə və ardıcıl olaraq reallşmasına, hər bir məhəllə və mikrorayonda əhali ilə səmimi ünsiyyət yaradılmasına, görüşlərin aşkarlıq və demokratiya şəraitində keçirilməsinə maksimim səy göstərilməlidir. Keçiriləcək görüşlərdə gənclərin də fəal iştirakının təmin edilməsinin, onların arzu və təkliflərini, cəmiyyətimizin inkişafı ilə bağlı ideyalarını diqqətlə öyrənərək, qaldırılmış məsələlərin reallaşması işinə məhz gənclərin özünün cəlb edilməsinin vacibliyi bildirilmişdir.

Tədbirdə Mənzil-istismar sahələrinin olmadığı ərazilərin məhəllə komitələri sədrləri Rövşən Hümbətov, Tamara Məmmədova, Xürrəm Bədəlov, Eldar Məhərrəmov, Roza Cəbiyeva, İnqilab Səlimov və digərləri çıxış edərək, təmsil etdikləri məhəllələrdə sakinləri narahat edən məsələlərlə, "Yerli Demokratiya həftəsi”nin yüksək səviyyədə keçirilməsi ilə bağlı fikir və təkliflərini bildirmişlər.

Həftə ərzində Bələdiyyə rəhbərliyinin vətəndaşlarla görüşlərinin gündəlik olaraq təşkil edilməsi, əhaliyə görülmüş işlər haqqında hesabatların verilməsi, Bələdiyyə ərazisində mövcud olan problemlər barədə müzakirələrin aparılması məqsədilə Sumqayıt Bələdiyyəsi həftənin bütün günləri "Açıq qapı” rejimində fəaliyyət göstərəcəkdir. Artıq vətəndaşların Bələdiyyə ilə birbaşa əlaqəsini təmin etmək üçün "qaynar xətt” təşkil edilmiş, vətəndaşların müraciətlərinin, arzu və təkliflərinin qeydə alınması məqsədilə Bələdiyyə binasının qarşısında və əhalinin sıx yaşadığı məhəllə və mikrorayonlarda "bələdiyyə poçtları”nın quraşdırılmasına başlanılmışdır.

***

Son iki gündə Sumqayıt Bələdiyyəsi "Yerli Demokratiya həftəsi” çərçivəsində növbəti tədbirləri Ceyranbatan qəsəbəsi yaxınlığındakı Yeni Yaşayış massivində və Kompressor zavodu ətrafında məcburi köçkünlərin kompakt yaşadığı ərazidə keçirmişdir. Sumqayıt Bələdiyyə sədrinin müavini Musa Həsənovun iştirak etdiyi, demokratiya şəraitində və açıq dialoq şəklində keçən həmin görüşlərdə də sakinləri narahat edən məsələlər diqqətlə öyrənilmiş, onların arzu və təklifləri dinlənilmişdir.

Orxan MƏMMƏDZADƏ.

Fotolar Amil Əhmədovundur.