"Azərikimya” İstehsalat Birliyinin akt zalında Birliyin idarə və müəssisə rəhbərlərinin, baş mühəndislərin, istehsalat və sahə rəislərinin iştirakı ilə geniş tədbir keçirilib. İB-nin Mətbuat xidmətindən Xeberle.com-a verilən məlumata görə, tədbiri giriş sözü ilə açan "Azərikimya” İB-nin Həmkarlar İttifaqı Komitəsinin sədri Vaqif Ömərov 2015-ci ilin 9 ayı ərzində Etilen-polietilen zavodunda aparılmış genişmiqyaslı yeniləşmə işlərindən, əsaslı təmirdən, qazanılan nailiyyətlərdən və bunun müqabilində kimyaçıların iş və sosial-məişət şəraitinin xeyli yaxşılaşmasından danışıb.

"Azərikimya” İB-nin baş mühəndisi Nadir Alıyev, İcraçı direktorun müşaviri Firudin Mustafayev çıxış edərək EP zavodunda aparılmış əsaslı təmirlə bağlı geniş məlumat verib, icrası nəzərdə tutulmuş 400 bəndin hamısının yüksək keyfiyyətlə yerinə yetirildiyini vurğulayıblar.

Tədbirdə eyni zamanda tullantıların idarə olunması ilə bağlı texniki əsaslandırma sənədinin hazırlanması məsələsinə də toxunulub, həmçinin layihəsi "Azərikimya” İB-nin xüsusi konstruktor bürosu tərəfindən hazırlanan, tikintisi Birliyin Təmir-tikinti İdarəsi tərəfindən həyata keçirilən propan-propilen fraksiyasının kükürdlü birləşmələrdən təmizlənməsi və butan-butilen fraksiyasının hidrogenləşməsi qurğularının tikintisində çalışan insanların əməyi yüksək qiymətləndirilib.

Tədbirdə əmək göstəriciləri ilə fərqlənən – 20 nəfər Etilen-polietilen zavodundan, 22 nəfər Təmir-tikinti İdarəsindən, 6 nəfər isə idarə aparatından olmaqla, ümumilikdə 48 nəfər fəxri fərman və qiymətli hədiyyələrlə mükafatlandırılıb.