Parlament seçkilərinin keçirilməsinə qalan müddət daraldıqca mübarizə də artır. Paytaxta çox yaxın yerləşən Sumqayıtda seçkilər hər zaman ''qaynarlığı'' ilə müşahidə olunub. Seçki prosesi - təbliğat-təşviqat kampaniyası dövründə baş verən hadisələri oxucuları ilə bölüşən Xeberle.com portalı xəbər çatdırma missiyası ilə yanaşı, redaksiyaya daxil olan şikayətləri də işıqlandırmaqda davam edir. Belə şikayətlərdən biri də 41 saylı Sumqayıt Birinci Seçki Dairəsindən deputatlığa namizəd Həcər Abbaslının qərargahından daxil olub. Şikayəti olduğu kimi təqdim edirik:
"Biz, Həcər Abbaslının deputat seçilməsi yönündə məqsədyönlü və qanunla tənzimlənən çərçivədə təbliğat aparırıq. Təbliğat kampaniyasına zidd olan hər hansı bir qadağaya yol vermirik. Ancaq dairəmizin 10, 12, 17, 18-ci mkr. və Corat ərazisində qanunla icazə verilən yerlərə yapışdırdığımız təbliğat-təşviqat vasitələri məqsədli şəkildə cırılır.
Eyni dairədən deputatlığa namizəd Mirzəcan Xəlilovun adamlarının bu işi həyata keçirməsindən şübhələnirik. Eyni zamanda bir neçə şəxsin onun tərəfindən təlimatlandırılaraq posterlərimizi qanunla icazə verilən yapışdırdığımız yerlərdən cırıldığı gələn xəbərlər arasındadır.
Mirzəcan Xəlilovun bu günlərdə 17-ci mkr ərazisində yerləşən "Nur” şadlıq sarayında məntəqə sədrləri üçün yeyib-içmək məclisi düzənləməsi də məlumdur. Bunu bizə adıçəkilən restoranın personalına yaxınlığı ilə seçilən mənbələr də təsdiqləyib.
Beləliklə, hər iki halda qarşı tərəf ciddi qanun pozuntularına yol verib. Üstəlik, Mirzəcan Xəlilova səs vermək üçün bir çox binaların sakinlərindən şəxsiyyət vəsiqələri də yığılıb. Bu isə daha bir qanun pozuntusudur.
Bütün bunları nəzərə alaraq, Azərbaycan Respublikasının prezidenti İlham Əliyev cənablarına, Heydər Əliyev Fondunun prezidenti, UNESCO və İSESCO-nun xoşməramlı səfiri və ölkənin birinci xanımı Mehriban Əliyevaya, Daxili İşlər naziri cənab Ramil Usubova, MSK sədri cənab Məzahir Pənahova müraciət edərək qanunsuzluqların qarşısının alınmasında hüquqi addımlar atılmasını xahiş edirik."
Xeberle.com