İsrail Beynəlxalq Təhlükəsizlik Cəmiyyətinin və "Safadi” adına İsrail Beynəlxalq Diplomatiya Akademiyasının sədri Safadi Mendi, Beynəlxalq Diplomatiya Akademiyasının MDB ölkələri üzrə eksperti, sülhməramlı səfir Aleksander Şapiro Suliman və "Hərbi Əlillərin Qeyri-Yəhudi Sektorunun” sədri cənab Samir Masalha Sumqayıt şəhərində olublar.

İlk öncə Ulu Öndər Heydər Əliyevin abidəsini ziyarət edən qonaqlar, abidənin önünə gül dəstələri qoyublar.

Daha sonra, Sumqayıt şəhərinin rəmzi sayılan "Sülh göyərçini”-ni, şəhərin görməli yerlərini gəzib və Sumqayıt Paralimpiya Kompleksinə baş çəkiblər.

İsrailli ekspertlər Azərbaycanın "kiçik modeli” olan Sumqayıt şəhərindəki geniş və müasir quruculuq işlərindən, yaradılan səliqə-səhmandan məmunluqlarını ifadə ediblər.

Onlar müasir beynəlxalq standartlara cavab verən Paralimpiya Kompleksində olmuş, əlilliyi olan insanlara ayrılan dövlət qayğısından və diqqətindən razı qaldıqlarını bildiriblər.

Qonaqlar gələcəkdə, İsrail və Azərbaycan dövlətləri arasında əlilliyi olan insanların reabilitasiyası istiqamətində birgə proqram və layihələrin, iki dövlətin paralimpiyaçıların arasında qarşılıqlı dostluq əlaqələrinin inkişafı istiqamətində təşəbbüslər irəli sürəcəklərini vurğulayıblar.

Sumqayıt şəhərində gördüklərindən məmun qalan qonaqlar, burada beynəlxalq səviyyəli proqram layihələr üçün tələb olunan uyğun şəraitin olduğunu qeyd ediblər.

Səfər zamanı qonaqları "Əlil Sahibkarlar Təşkilatı” İctimai Birliyinin sədri Mirzə Məmmədvəliyev, təşkilatın Sumqayıt şəhər şöbəsinin sədri Mədaxil Cavadlı, Sumqayıt şəhər İcra Hakimiyyətinin və Azərbaycan Paralimpiya Komitəsinin rəsmiləri müşayiət ediblər.