FHN-in Sumqayıt Regional Mərkəzi maarifləndirmə tədbiri keçirib.
Fövqəladə Hallar Nazirliyinin Sumqayıt Regional Mərkəzi Sumqayıt şəhəri 38 nömrəli tam orta məktəbdə "Uşaq hüquqları aylığı” çərçivəsində "Fövqəladə hallar zamanı davranış və yanğın təhlükəsizliyi qaydaları” mövzusunda maarifləndirmə tədbiri keçirib.

Mərkəzdən Xeberle.com-a verilən məlumata görə, tədbirdə Fövqəladə Hallar Nazirliyi Sumqayıt Regional Mərkəzinin, Sumqayıt şəhər Dövlət Yanğından Mühafizə İdarəsinin, Sumqayıt şəhər Təhsil Şöbəsinin əməkdaşları, məktəbin müəllim və şagirdləri iştirak ediblər.

Tədbir nəzəri və praktiki olmaqla iki hissədən ibarət olub.

Tədbirin nəzəri hissəsində Mərkəzin əməkdaşları "Fövqəladə hallar zamanı davranış qaydaları”, "Yanğın təhlükəsizliyi qaydaları”, "Məişətdə qaz cihazlarından düzgün istifadə qaydaları”, "Elektriklə davranış qaydaları”, "Zərərçəkmiş insanlara ilkin tibbi yardımın göstərilməsi” və "112” qaynar telefon xətti təhlükəsizliyimizin qarantıdır” mövzularında çıxışlar ediblər.

Çıxışlardan sonra Fövqəladə Hallar Nazirliyinin hazırladığı "Dəm qazı təhlükəsi” adlı videoçarx nümayiş olunub.

Daha sonra suallar cavablandırılıb, təbliğat materialları, bukletlər paylanılıb.

Tədbirin praktiki hissəsində məktəbin həyətində mərkəzin və Sumqayıt şəhər Dövlət Yanğından Mühafizə İdarəsinin qüvvə və texnikasına baxış keçirilib, onların təyinatı və istifadəsi qaydaları haqqında məlumat verilib.