Artıq noyabrın 1-də Mili Məclisə keçirilən seçkilərdən bir həftəyə yaxın vaxt keçir. Amma hələ də seçkilərin nəticələrindən razı qalmayanlar da var. 42 saylı Sumqayıt II seçki dairəsindən deputatlığa namizəd olmuş Hafiz Babalı da nəticələrlə razılaşmır. O, namizəd olduğu dairədə seçkilərin qanun pozuntuları ilə müşayət olunduğunu və saxtakarlıq hallarına yol verildiyini iddia edir. H. Babalı Xeberle.com-a bildirib ki, şikayəti ilə bağlı bu gün 42 saylı Sumqayıt II seçki dairəsində olub. Deputatlığa namizəd deyir ki, ondan pozuntulara dair aktların əsillərini təqdim etməyi tələb edirblər:"Bu gün araşdırılma aparılması üçün səhər saat 09:15-də DSK-da idim. Məndən pozuntulara dair Aktların əsillərini onlara təqdim etməyimi tələb etdilər. Bildirdim ki,aktları bir şərtlə onlara verə bilərəm ki, surətləri "Əsli ilə düzdür" ştampı və imza ilə təsdiqləyəsiz və ya aktların əslinin alınmasına dair mənə hər hansı bir sənəd verilsin. Lakin DSK sədri Ruslan Hacıyev, katiblər Sevinc Mikayılova və Pənah Baxşıyev belə bunların heç birini edə bilməyəcəklərini bildirdilər. Mənə dedilər ki, ya onları təqdim edirəm, ya da ki poçtla göndərirəm. Bildirdim ki, hansı təminat var ki, siz təqdim etdiyim 37 aktın arasından bir neçəsini götürüb, aktların hamısının yerində olmayacağını bildirməyəcəksiniz? Təxminən saat yarım DSK-da oldum. Nəhayət yazılı izahat təqdim etdim ki, yalnız yuxarıda qeyd olunan şərtlər daxilində Aktların əslini rəsmən təqdim edə bilərəm. Aktların əslini DSK-nın iki üzvünə göstərdim. İzahatımı S. Mikayılovaya təqdim edib DSK-dan çıxdım. Nəhayət poçta getdim və DSK-ya izahatıma uyğun teleqram vurdum.”

H. Babalı aktların əsillərinin DSK-ya təqdim etməməyini belə əsaslandırıb: "Aktların əslini əldən verməklə mən Avropa məhkəməsi perspektivinin üstündən xətt çəkə bilmərəm. Güman edirəm ki, DSK-da da elə buna çalışırdılar. Güman edirəm ki, sabah artıq mənə qərarı təqdim edəcəklər. Zatən, qərar artıq hazır idi. DSK üzvləri seçki günü məntəqələri gəzib mənim müşahidəçilərimə mane olmaqla məşğul olublar. Onlardan hansı qərar gözləmək olar ki?”

H. Babalı özünü 42-ci dairənin mandatsız deputatı hesab edir və deyir ki, dairənin seçiciləri qarşılaşdığı problemlərlə bağlı çəkinmədən ona müraciət edə bilərlər: "Mən 5 min qapı döydüm, bütün məhəllə və mikrorayonları həyətbəhəyət gəzdim. Vətəndaşı narahat edən problem və çətinlikləri onların dilindən eşitdim. Məncə, mandat şərt deyil, əsas Vətəni sevməkdir. Sumqayıtlılar, özəlliklə 42-ci dairənin seçiciləri heç nə itirmədilər. Mənə səs verən minlərlə seçicimin yanında olmağa çalışacam. Mənim üçün 2 noyabrdan artıq yeni bir dönəm başlayıb: Real iş görmək zamanıdır!

 Xeberle.com