Artıq neçənci dəfədir ki, Sumqayıt şəhərinin xəbər saytı - Xeberle.com portalı şəhər tədbirlərinə buraxılmır. Səbəb nədir? Hər halda, bunun səbəbini bilməkdən çox bu problemin tezliklə çözülməsi vacibdir. Bunun bir açıqlaması olmalıdır, ya yox?! Sumqayıt şəhər İcra Hakimiyyəti tərəfindən təşkil olunan tədbirlərdə digər media orqanları - həm müstəqil, həm dövlət - iştirak etsələr də, xeberle.com o siyahıya düşmür. Artıq bu barədə rəsmi sorğu hazırlanıb və nəticəsi də bugünlərdə geniş şəkildə ictimaiyyətə açıqlanacaq.
İndi isə keçək konkret olaya. Bu gün 9 Noyabr Dövlət Bayrağı Günü münasibətilə Sumqayıt Dövlət Dram Teatrının binasında keçirilən tədbirə əməkdaşlarımız – redaktor Ramil Zeynallı və fotoqrafımız Kamran Kazımzadə buraxılmayıblar. İcra hakimiyyətinin İnformasiya təminatı və təhlil sektorunun müdiri Ənvər Hüseynov isə bu məsələyə tutarlı bir cavab tapmayıb və sadəcə deyib ki, siz dəvət olunmamısınız, vəssalam. Əlavə fikir bildirməyərək ünsiyyətdən qaçıb... İndi növbəti sual yaranır, məgər, KİV də dəvət olunmalıdır tədbirə? Məgər KİV qonaq qismindədir? Bəs o jurnalist vəsiqəsinin "rolu" nədən ibarətdir, hörmətli Sumqayıt şəhər İcra Hakimiyyətinin rəsmisi?!
Bilin və agah olun ki, KİV azad şəkildə tədbirə qatılıb oradan material hazırlamaq hüququna malikdir. Bu da jurnalistin hüququ və peşə vəzifəsi, borcudur. Məlumunuz olsun ki, bu hal jurnalistin hüquqlarının kobud şəkildə pozulması deməkdir. Prezident İlham Əliyev dəfələrlə bəyan edib ki, Azərbaycanda jurnalistlərin hüquqları tam şəkildə qorunmalıdır, müdafiə olunmalıdır. Jurnalistlərə qarşı hörmətsizlik, zorakılıq edilməməlidir.
Aydındır ki, bayraq gününün qeyd olunması və bunun təbliği, işıqlandırılması ilk növbədə vətənpərvərliyin artırılmasına xidmət edən bir haldır. Ölkə prezidenti İlham Əliyev mətbuatla bağlı çıxışlarının birində söyləyib ki, jurnalistikada vətənpərvərlik mövzuları ilə bağlı daha da ciddi işlər aparılmalıdır, xüsusilə, müharibə şəraitində olan ölkələrdə bu, daha da böyük məna daşıyır: "Azərbaycan müharibə şəraitində yaşayır. Ona görə gənc nəslimizin vətənpərvərlik ruhunda tərbiyə olunması işində medianın müstəsna xidmətləri vardır. Məsələn, hansısa telereportajda, ya hansısa yazılı mətbuatda vətənpərvərlik ilə bağlı çox ciddi və mənalı mövzuların işıqlandırıldığını görəndə bu, məni çox sevindirir. Medianın bu sahədəki fəaliyyəti əvəzolunmazdır. Mən hesab edirəm ki, biz bu istiqaməti daha da gücləndirməliyik. ”
Amma məhz prezidentin toxunduğu məqamlarla bağlı Sumqayıtda müəyyən süni manelər törədilir. Vətənpərvərlik ruhunun artırılması istiqamətində təşkil olunan tədbirdə iştirak edərək onun işıqlandırılmasına imkan verilmir. Məgər təşkilatçıların belə bir tədbirin daha çox və geniş auditoriya üçün işıqlandırılması, təbliği elə bir əhəmiyyət kəsb etmir?!
Xeberle.com olaraq özümüzə qiymət vermək, özümüzü tərifləmək istəməzdik, amma Sumqayıt oxucusu bizə çoxdan dəyər və qiymət verib. Bu gün sutkalıq olaraq azı 25-30 min oxucumuz varsa, bu bizə yetərlidir. Yəni onlar anlamırlar ki, Xeberle.com-a tədbirdə iştiraka icazə vermək yalnız özlərinə faydalıdır. Bizim məqsədimiz sadəcə şəhər tədbirlərini işıqlandıraraq şəhər sakinlərinə çatdırmaqdır. Necə ki, bunu 4 ilə yaxındır həyata keçiririk. Bu illərdə Xeberle.com Sumqayıtın səsinə çevrilərək şəhərin xeyli problemini işıqlandırıb. Onların bir qismi isə həllini tapıb (Misal olaraq bir müddət çox yayılan atmosferdəki zəhərli qazlar - ''qazovka'' problemi, ağac kəsilməsi halları, bərbad yollar problemləri və sair). Amma problemlərin işıqlandırılması bir yana, şəhərin ictimai, sosial və mədəni həyatında baş verən mühüm hadisə və tədbirləri də oxucularına sadəcə xəbər şəklində, əlavə şərh olmadan, çatdırmağı əsas vəzifəsi hesab edir bu portal. Məsələn, son günlərdə saytımızda verdiyimiz şəhər tədbirlərinin bir neçəsinə diqqət edək:
[url=http://xeberle.com/az/view/17023/sumqaytda-bayraq-gnne-hesr-olunmus-resm-msabiqesi-keirilib/?]http://xeberle.com/az/view/17023/sumqaytda-bayraq-gnne-hesr-olunmus-resm-msabiqesi-keirilib/[/url]
[url=http://xeberle.com/az/view/16897/sumqaytda-seiciler-maariflendirilib/?]http://xeberle.com/az/view/16897/sumqaytda-seiciler-maariflendirilib/[/url]
[url=http://xeberle.com/az/view/16882/sumqaytda-dini-radikalizmle-mbarizede-icmalarn-rolu-mzakire-olunub/?]http://xeberle.com/az/view/16882/sumqaytda-dini-radikalizmle-mbarizede-icmalarn-rolu-mzakire-olunub/[/url]
[url=http://xeberle.com/az/view/16881/sumqaytda-i-usaq-paralimpiya-idman-oyunlar-keirilecek/?]http://xeberle.com/az/view/16881/sumqaytda-i-usaq-paralimpiya-idman-oyunlar-keirilecek/[/url]
Belə çıxır ki, Sumqayıtda baş tutan tədbirlərin işıqlandırılması, pozitiv xəbərlərin daha çox yayımlanması şəhər rəhbərliyi üçün elə vacib deyil. Necə deyərlər, "Ya zəlzələdən, ya vəlvələdən". Amma biz tədbirlərə buraxılmayacağıqsa, yenə də öz tutduğumuz doğru yoldan çəkinməyəcəyik.

Xeberle.com
P.S. Sözü üzə demək, səmimiyyət yaxşı şeydir. Gizlətməyin qərarınızın səbəbini.
Həqiqətən də obyektiv, bitərəf media olmağın çətinliyini belə məqamlarda xüsusilə duymaq olur.