Azəri Gənclər Alyansı İctimai Birliyi Prezident yanında Gənclər Fondunun dəstəyi ilə "Gənclər yaşıl həyat naminə” mövzusunda həyata keçirilən layihə çərçivəsində noyabrın 5-dən 7-dək Sumqayıt şəhərində 50-dən çox fəal gənclər üçün seminar keçirilib, noyabrın 12-də isə gənclər tərəfindən Sumqayıtda ağac əkmə aksiyası təşkil edilib.

Birliyin mətbuat xidmətindən verilən məlumata görə, layihə iştirakçıları tərəfindən  nar ağacları əkilib. Aksiya Ə.Əliyev adına Sumqayıt Tibb kollecinin həyətində baş tutub. Ağac əkmə mərasimində 30-dan çox Sumqayıtlı gənc fəal iştirak edib. Sumqayıt Tibb Kollecinin direktoru Rafayıl Eyvazov Sumqayıt şəhərinin yaşıllaşdırılmasına xüsusi önəm verildiyini və bu aksiyada xüsusi fəallıq göstərən kollecin tələbələri ilə fəxr etdiyini qeyd edib. Layihə ekspertləri Azərbaycan Respublikası Ekologiya və Təbii Sərvətlər nazirliyinin əməkdaşları Vüsal İbrahimli, Elmir Musayev və Sumqayıt şəhər Gənclər və İdman Baş idarəsinin nümayəndəsi Ceyhun Hüseynov bu tipli maarifləndirici layihələrin davamlı olmasını vacibliyini vurğulayıb .