Sumqayıtda növbəti nümunəvi məhəllə istifadəyə verilib.
Bu münasibətlə keçirilən mərasimdə iştirak edən şəhər rəhbərliyi, Milli Məclisin deputatları, hüquq mühafizə orqanlarının, bələdiyyə, idarə və təşkilatların rəhbərləri, şəhərin 34–cü məhəlləsində yaşayan sakinlərlə görüşüb, onların müraciət və təkliflərini dinləyiblər.
Sumqayıt Şəhər İcra Hakimiyyətinin başçısı Eldar Əzizov ölkənin hər yerində olduğu kimi, Sumqayıtda da abadlıq-quruculuq işlərinin geniş vüsət aldığını, sosialyönümlü layihələrin ardıcıl həyata keçirildiyini diqqətə çatdırmışdır. Bildirmişdir ki, Sumqayıtın inkişafının, memarlıq estetikasının Bakı standartlarına yaxınlaşması ilə əlaqədar dövlətimizin başçısı İlham Əliyevin tapşırığı uğurla yerinə yetirilməkdədir. Müasir sənaye mərkəzi kimi formalaşan şəhərdə çoxlu iş yerləri yaradılır, yeni və müasir müəssisələr açılır.
Görüşdə şəhər sakinlərini narahat edən müraciətlər dinlənilmişdir. Vətəndaşlar tərəfindən qaldırılan məsələlərin, müraciətlərin əksər hissəsi sosial və digər məişət problemləri ilə əlaqədar təklif və təşəbbüs xarakterli olmuşdur. Qaldırılan məsələlərin bir qismi yerindəcə həll edilmiş, müəyyən vaxt tələb edən bir sıra məsələlər isə nəzarətə götürülmüş, aidiyyəti qurumların rəhbərlərinə tapşırıqlar verilib.
Tədbirdə iştirak edən sakinlər yaradılan şəraitə, diqqət və qayğıya görə dövlətimizin başçısına minnətdarlıqlarını bildiriblər.
Daha sonra nümunəvi məhəlləyə ictimai baxış olmuşdur. Həyətdə uşaq əyləncə qurğuları, rahat oturacaqlar quraşdırılmış, uşaqlar üçün idman meydançası tikilmiş, ağaclar əkilmiş, binaların fasadları rənglənmiş, dam örtüyü dəyişdirilib..
Açılış mərasimi konsert proqramı ilə davam edib.
Qeyd edək ki, indiyədək Sumqayıtda 10 nümunəvi məhəllə istifadəyə verilib.
Layihə davam edir.  /azərtac/

FOTOLAR Kamran Kazımzadənındir