Sumqayıtda bir çox mədəniyyət obyektlərinin tikintisi və təmiri nəzərdə tutulub. Bunu şəhərin icra başçısı Zakir Fərəcov bu gün Sumqayıt Dövlət Rəsm Qalereyasında Sumqayıt rəssamlarının əsərlərindən ibarət "Rənglərin aləmi" adlı sərgidə çıxışı zamanı söyləyib. O qeyd edib ki, Sumqayıtda kütləvi tədbirlərin keçirilməsi üçün böyük, müasir tələblərə cavab verən zal yoxdur. Odur ki, tezliklə Sumqayıt Dövlət Dram Teatrının binası yüksək səviyyədə təmir olunaraq tam hazır vəziyyətə gətiriləcək. Zakir Fərəcov fikrinə əlavə edib ki, ölkə başçısı İlham Əliyev ARDNŞ-ə tapşırıb ki, "Kimyaçılar” mədəniyyət sarayının təmirini yaxın zamanlarda başa çatdırsın.
Sumqayıt rəssamları üçün də müjdə var. Belə ki, bu yaxınlarda şəhərin yaradıcı gəncləri – rəssamlar üçün emalatxananın tikintisinə başlanılacaq. Bugünkü sərgidə icra başçısı şəhər Mədəniyyət və Turizm İdarəsinin rəisi Mehman Şükürova tapşırıb ki, Sumqayıt rəssamları üçün emalatxana tikilməlidir və yaxın günlərdə bunula bağlı layihəni hazırlayıb icra hakimiyyətinə təqdim olunmalıdır. Zakir Fərəcov bunu Sumqayıtın rəssamlarına hədiyyə edəcək.
Bundan əlavə, bildiyimiz kimi, Sumqayıtda bir neçə mədəniyyət obyektinin tikintisinə artıq start verilib. "Şərq bazarı” yaxınlığında uzun illərdən bəri yarımçıq və yararsız qalmış tikili nəhayət ki söküldü və həmin ərazidə musiqi məktəbinin tikilməsi planlaşdırılır. Məktəbin layihəsi də artıq hazırdır və yaxın zamanlarda inşasına başlanılacaq.
İcra başçısı bildirib ki, 8 aya tikilməsi nəzərdə tutulan musiqi məktəbi 3 saylı olacaq. Burada kitabxana, akt zalı, tədris otaqları və müəllimlər otağının yaradılması nəzərdə tutulur. Həmçinin üçmərtəbəli binada ayrıca inzibati otaqlar da yerləşəcək.
Sumqayıt şəhərində müasir standartlara cavab verən şahmat məktəbinin tikintisinə isə artıq başlanılıb. Şahmat məktəbi hazırda təmir işləri aparılan, şəhərin 9-cu mikrorayon ərazisində yerləşən Heydər Əliyev parkında tikilir.
Sumqayıtda müasir üslubda yeni Heydər Əliyev Mərkəzinin tikintisinə başlanılması xəbərini isə əksər Sumqayıt sakini bilir. 4 mərtəbədən ibarət olacaq mərkəzdə 400 nəfərlik akt zalı, nikah mərasimlərinin keçiriləcəyi zal, gənclər üçün müzakirə və diskussiya zalları, elektron kitabxana yaradılacaq. Möhtəşəm görünüşü ilə hər kəsi heyran edəcək mərkəzdə linqafon, internet və rəssamlıq otaqları, fotostudiya və rəqs zalı da fəaliyyət göstərəcək.

Xəzər sahilində salınacaq Sumqayıt bulvarında isə kinoteatrın tikintisi nəzərdə tutulub.