Sumqayıtda 11-ci mikrorayon sakinlərini aldadıblar ki, evlərinin yanında park tikiləcək, amma əvəzinə, profaktoriyalar tikilməkdədir

Sumqayıt şəhər 11-ci mikrorayonun arxa tərəfində bir müddət idi ki, sakinləri narahat edən problemlər yaranmışdı. Belə ki, orada əvvəllər sakinlərin sənədsiz bağları var idi. Eks icra başçısı Vaqif Əliyevin dövründə həmin bağlar söküldü ki, deyildi ki, onların yerində park salınacaq. Amma...

Hazırda isə həmin yerlər profaktoriya (avtomobil təmiri sexləri) kimi satılıb. Adının çəkilməsini istəməyən alıcı söyləyib ki, sözügedən yeri profaktoriya üçün sotunu 20000 dollara alıb. Hazırda ərazidə qaynar tikinti-təmir işləri gedir. Xeberle.com-a daxil olan məlumata görə, yer sahiblərinə deyilib ki, obyektlərinizi təcili tikin, özü də ikimərtəbə. Ən pisi budur ki, profaktoriyaların girişi də bina tərəfdən olacaq, çünki yolun qırağı ilə yüzlük qaz borusu keçir. Lakin xeyli müddətdir ki, ərazidə yaşayan sakinlər bundan narazılıq edir, onlar müfaviq qurumlara şikayətlər ediblər. 

Dünən axşam saatlarında ərziyə baş çəkdik. Yolun qarşı tərəfi başdan başa profaktoriyalardır. Hal-hazırda binanın arxa tərəfində qızğın işlərlər gedir. Tikintilərlə binaların ara məsafəsi çox azdır. Evlərin içi görünür. Orada yaşayan sakinlər portalımıza bildirir: “Bu tikintilər başlayanda Sumqayıt Şəhər Memarlıq və Şəhərsalma İdarəsinə və digər müvafiq qurumlara muraciət etdik, amma bizə burada park salınacağını bildirdilər. Sonradan ərazidə tikintinin başlandığını gördük. Kişilər, əsasən də 29-cu binanın sakinləri müvafiq yerlərə müraciət ediblər, bir nəticə olmadı", - deyə söylədilər.

Sakinlər söyləyir ki, obyektlər çox namünasib yerlərdə tikilib: “Tikintinin, giriş-çıxışının üzü o biri tərəfdən olacağını bildirdilər. Hal-hazırda isə tikilən obyektlərin yolu bina tərəfdəndir, evin içi görünür, paltar sərmək olmur, eyvana çıxmaq olmur... Guya müvafiq qurumlar bunu görmür, bilmir?! Hara lazımdır, demişik, belə biabırçılıq olmaz”, - deyə gileyləndilər.

Xeberle.com

***

Bu gün günorta saatlarından isə 11-ci mikrorayon sakinləri etiraz aksiyası keçirirlər. Hazırda Çerkassi küçəsi adlanan ərazidə sakinlər yolu kəsiblər. Onlar icra strukturları tərəfindən aldadıldıqlarını iddia edirlər. Sakinlər birlik.az saytına danışdılar ki, bu ərazidə 25 ilə yaxındır biz bağ-bağat əkmişdik. Meyvə ağacları, güllər əraziyə xüsusi gözəllik verirdi. İcra adamları gəlib dedilər ki, bu bağçaların hamısı sökülməli, burada Zərifə Əliyeva adına park tikilməlidir. Biz də razılaşdıq. Amma indi görürsünüzmü vəziyyət necədir? Bütün ərazi satılıb 2-3 mərtəbəli obyektlər tikilir. Xeyli sayda ağac kəsildi burada. Bir çox qurumlara müraciət etdik, nəticəsi olmadı. Dərdimizi kimə söylərək? Mikrorayonun içərisində, məktəbin yanında erməni-rus qəbiristanlığı, arxasında da ki bu biabırçı vəziyyət.”

Sakinlər evlərinin axasında gedən tikililərin onlara rahatçılıq vermədiyindən də şikayətləniblər. "Artıq evlərimizdə səsdən otura bilmirik".

Daha bir sakin isə bildirdi ki, “bizə icra hakimiyyətindən bildirdilər ki, ağaclar qanunsuz kəsib, bizim xəbərimiz yoxdur”

Qeyd edək ki, aksiyaya ölkə telekanallarından çəkiliş də gəlib. 

P.S. Əməkdaşımız dünən axşam saatlarında ərazidən mövcud durumu əks etdirən fotolar çəkib. Sonuncu fotoda yolun qarşı tərəfində fəaliyyət göstərən obyektlər – profaktoriyalardır.

İlk 3-4-cü fotolarda açıq-aydın görünür ki, profaktoriyaların girişi də bina tərəfdən olacaq.