Xeberle.com xəbər verir ki, SOCAR-ın «Azərikimya» İstehsalat Birliyinin təşkilatçılığı ilə Sumqayıt şəhərində müxtəlif xəstəliklərə qarşı profilaktik tədbirlərin həyata keçirilməsinin vəziyyəti mövzusunda şəhərin tibb müəssisələrinin aparıcı həkimləri ilə görüş-müzakirə keçirib.
Kimyaçılarla birgə KİV nümayəndələrinin, Paşa Sığorta ASC-nin əməkdaşlarının da iştirak etdiyi tədbiri giriş sözü ilə «Azərikimya» İB-nin Həmkarlar İttifaqı Komitəsinin sədri Vaqif Ömərov açıb, tədbirin məqsəd və qayəsi haqqında məlumat verib.
Tədbirə dəvət olunmuş təcrübəli həkimlər - şəhərin baş terapevti, Bərpa xəstəxanasının baş həkimi Kamil İbadov, Təcili Tibbi Yardım Xəstəxanasının cərrahiyyə şöbəsinin müdiri Vaqif Qəhrəmanov, Ruhi-əsəb dispanserinin baş həkimi, şəhərin baş psixiatrı Mayılxan Tağıyev, Təcili Tibbi Yardım Xəstəxanasının neyrocərrahiyyə şöbəsinin müdiri Emin Yaqubov, Uşaq xəstəxanasının şöbə müdiri, şəhərin baş infeksionisti Sehri Babayev, Onkoloji Dispanserin həkim-onkoloqu Murad Məmmədov, həmçinin Səhiyyə şöbəsinin müdir müavini Bərxudar Məmmədov kimyaçıları maraqlandıran sualları cavablandırıb, bir sıra xəstəliklərə, o cümlədən infeksion xəstəliklərə qarşı həyata keçirilən profilaktik tədbirlərlə bağlı məsləhət və tövsiyələrini verib. Qeyd olunub ki, bu xəstəliklərin profilaktikasında şəxsi gigiyenanın gözlənilməsinin, normal yuxunun, düzgün qidalanmanın, sağlam psixoloji mühitin, idman-sağlamlıq tədbirlərinin, su prosedurlarının, çoxlu maye qəbul edilməsinin və qoruyucu vasitələrdən istifadənin böyük əhəmiyyəti vardır. 
Maraqlı sual-cavab və diskussiya şəraitində keçən tədbirin sonunda kimyaçılar həkimlərə dəvətlərini qəbul edib gəldiklərinə görə dərin minnətdarlıqlarını bildiriblər.