Fövqəladə Hallar Nazirliyinin (FHN) Sumqayıt Regional Mərkəzi fevralın 3-də 1 nömrəli Sumqayıt Şəhər Xəstəxanasında "Fövqəladə hallar zamanı davranış və yanğın təhlükəsizliyi qaydaları” mövzusunda maarifləndirmə tədbiri keçirib.

FHN-in mətbuat xidmətindən  bildiriblər ki, tədbirin keçirilməsində məqsəd səhiyyə müəssisələrində baş verə biləcək yanğın və ya partlayış hadisələrinin qarşısının alınması məqsədilə profilaktik tədbirlərin görülməsi, səhiyyə işçilərinin fövqəladə hallar zamanı davranış qaydaları və mülki müdafiə sahəsində biliklərinin artırılması olub.

Tədbirdə Sumqayıt Regional Mərkəzinin və poliklinikanın əməkdaşları iştirak ediblər.

Mərkəzin əməkdaşları "Fövqəladə hallar zamanı davranış qaydaları”, "Yanğın təhlükəsizliyi qaydaları”, "Məişətdə qaz cihazlarından düzgün istifadə qaydaları”, "Elektriklə davranış qaydaları” və "112” qaynar telefon xətti təhlükəsizliyimizin qarantıdır” mövzularında çıxışlar ediblər.

Sonra Fövqəladə Hallar Nazirliyinin hazırladığı "Dəm qazı təhlükəsi” adlı videoçarx nümayiş olunub.

Sonda suallar cavablandırılıb və iştirakçılara təbliğat materialları, yaddaş kitabçaları, bukletlər paylanılıb.