Xəbər verdiyimiz kimi, 2 fevral Gənclər Günü ilə bağlı Sumqayıtda şəhər İcra Hakimiyyətinin təşəbbüsü və şəhər Gənclər və İdman Baş İdarəsinin təşkilati dəstəyi ilə sumqayıtlı gəncləri üçün bayram tədbiri keçirilib, ötən ildə fərqlənən gənclər və gənclər təşkilatları 29 müxtəlif nominasiya üzrə təltif ediliblər.

Həmin gənclərdən biri də "Dünya” Müstəqil Teleradio Şirkətinin "Xəbərlər” İnformasiya Departamentinin direktoru Nizami Rəsulov olub. O, "ilin ən yaxşı telejurnalisti" mükafatı ilə təltif edilib. Qazandığı mükafat, Gənclər günü və Sumqayıt gəncləri ilə bağlı fikir və təəssüratlarını Xeberle.com portalı ilə bölüşən Nizami Rəsulov söyləyib ki, 10 ildən çoxdur televiziya sahəsində çalışır və ölkənin müxtəlif aparıcı televiyalarında (ANS və Xəzər TV) məsul şəxs və müxbir vəzifələrində çalışıb. "İlin telejurnalisti adına layiq görülməyim bu sahəyə olan hörmətdən irəli gəlir və bütövlükdə Sumqayıt gəncinə verilən ən dəyərli qiymət hesab edirəm. Xidmətim dövründə yüksək fəaliyyətimə görə bir sıra adlara da layiq görülmüşəm. İşimdən çox məmnunam. Çünki bu sahənin sahibiyəm, qəlbən bu peşəya bağlıyam. Elə ixtisasım da jurnalistikadır. Mənim üçün statusun, vəzifənin böyük önəmi yoxdur. Mən "Xəbərlər”in direktoru da ola bilərəm, sadəcə bölgə müxbiri də. Belə ki, Dünya TV-də işlədiyim bu illər ərzində xəbər müdiri olmağımla yanaşı, həmçinin Abşeron rayonunda bölgə müxbiri səlahiyyətlərini icra edirəm. Yeri gəlmişkən, Abşeron da mənə çox şeyi ifadə edir. Elə Sumqayıt qədər doğmadır və əzizdir”, - deyə o, çalışdığı telekanaldakı fəaliyyətindən söz açaraq bildirib.

Nizami Rəsulov daha sonra Sumqayıt gənclərindən söz açıb: "Sumqayıt gəncləri mən deyərdim ki, Respublikada ən istedadlı və öz sözünü deməyi bacaranlardır. Sumqayıt şəhəri öz gəncləri ilə hər zaman öyünüb. Şəhər burada yaşayıb yaradan, onu canı qədər sevən bütün insanlar üçün çox əzizdir. Bu gün həmrəylik şəhərinin gəncləri Sumqayıtda aparılan işlərdən də çox şey gözləyirlər. Hər kəs öz evinin necə abad, necə gözəl olmasını istəyirsə, Sumqayıtın hər bir gənci də bu şəhəri elə görür və sevir. Şəxsən mən Sumqayıtı öz evim hesab edirəm. Sumqayıtda yaşayıram və fəaliyyət göstərirəm. Bu şəhərlə bağlı deyilən hər sözü - ünvanıma deyilən kəlmə kimi qəbul edirəm. Fikrimcə, bu gün Sumqayıt gənci öz şəhərini abad görmək istəyir. İllərimi jurnalistikaya həsr edən bir gənc kimi deyə bilərəm ki, Sumqayıt bu gün özünün intibah dövrünü yaşayır. Gənclik şəhərində görülən işlər, atılan hər bir addım Prezident İlham Əliyevin vətəndaşlara olan diqqət və qayğısının bariz nümunəsidir”, - deyə o qeyd edib.
İcra başçısı Zakir Fərəcovun Sumqayıtda gördüyü işlərdən danışan telejurnalist 4 aydan çoxdur ki, Sumqayıtın çiçəkləndiyini və inkişaf etdiyini vurğulayıb: "Sumqayıt şəhərinə İcra Hakimiyyəti başçısı təyin olunan Zakir Fərəcov humanist, qayğıkeş, ən əsası isə əsl qurucu insandır - deyərdim ki. Abşeron rayonunda işlədiyi 10 il ərzində bütün sahələrdə inkişaf dinamikası höküm sürdü. Yaşadı və yaratdı. Hazırda Sumqayıt şəhərinin İcra Hakimiyyəti başçısı olan Zakir Fərəcov hər zaman gənclərin, eləcə də istedadlı insanların yanında olub”, - deyə Nizami Rəsulov söyləyib.

Mükafatçı bu gün Sumqayıtda gənclərə olan diqqət və qayğıdan da söz açıb: "Gənclər respublikamızın aparıcı qüvvəsidir. Sumqayıt şəhərində gənclərə olan diqqət özünəməxsusluğu ilə seçilir. Sumqayıt Şəhər İcra Hakimiyyəti başçısı Zakir Fərəcov hər zaman gənclərlə işləməyi üstün tutub. Bu gün icra başçısının kadr siyasəti birbaşa gənclərlə bağlıdır. "Sumqayıt şəhərində yalnız bu şəhərdən olan insanlar işləməlidir" - deyən Zakir Fərəcovun bu ifadəsi bu gün gənclərə bir stimul verib. 2 Fevral, 2016-cı il. Bu tarix mənə çox əziz və yaddaqalan oldu. Çünki Gənclər Günündə mən Sumqayıt şəhər İcra Hakimiyyəti başçısının Fəxri Fərmanı ilə "İlin telejurnalisti” adına layiq görüldüm. Düzü, bu adı çoxdan gözləyirdim. Bu addım mənim timsalımda Sumqayıt şəhər İcra Hakimiyyəti başçısının mətbuata olan diqqətinin göstəricisidir”, - o deyib.
Nizami Rəsulov ölkəmizdə jurnalistlərin sosial vəziyyəti, onların rifah halının yaxşılaşdırılması istqamətində də fikirlərini paylaşıb: "Hazırda ölkəmizdə azad mətbuata, televiziyalara xüsusi bir rəğbət bəslənilir. Prezident İlham Əliyevin məlum tapşırığı ilə jurnalistlərin sosial rifahı, mənzil, məişət şəraitinin yaxşılaşdırılması üçün yeni yaşayış binalarının tikilərək istifadəyə verlməsi onlara göstərilən diqqətin bariz nümunəsidir. Mən çox istərdim ki, ölkə başçısının bu humanist missiyası Həmrəylik şəhəri olan Sumqayıtda da öz əksini tapsın. Sumqayıt şəhərində yaşayıb yaradan biz jurnalistlər üçün heç olmasa 1 bloklu yaşayış binası inşa olunsun. Bu da Sumqayıtın tarixində ilk olar. Ümid edirəm Sumqayıt şəhər rəhbərliyi bu təklifimə bir nəzər yetirər.

"Fəaliyyətiniz dövründə hansı çətinliklərlə üzləşirsiniz" sualına N.Rəsulov belə cavab verib:

"Yuxarıda qeyd etdiyim kimi, neçə ildir televiziya sahəsində çalışıram. Bir reportajın hazırlanması elə də asan başa gəlmir. Hətta elə olur ki, adi məktəb direktorundan, MİS müdirindən bir informasıyanı əldə etmək üçün çətinlik çəkirsən. Sumqayıtda belə hallarla tez tez rastlaşmışam. Bir idarə rəhbərindən mövzu ətrafında cavab ala bilməmək bazara pulsuz gedib, evə əliboş qayıtmaq kimi bir şeydir. Düşünürəm ki, Sumqayıt şəhərində jurnalist və məmur arasında bir körpü yaratmağın vaxtı çatıb", - sitatın sonu.

Qeyd edək ki, Nizami Rəsulov 2009-cu ildən "Dünya” Müstəqil Teleradio Şirkətinin "Xəbərlər” İnformasiya Departamentinin direktoru vəzifəsini icra edir.

Xeberle.com