"Ötən il iyunun 1-dən bu günə qədər nikaha daxil olmaq istəyən 107 500 insan tibbi müayinədən keçib".

Bunu Modern.az-a açıqlamasında B.Eyvazov adına Elmi-Tədqiqat Hematologiya və Transfuziologiya İnstitutunun direktoru Zöhrə Əlimirzəyeva bildirib. O qeyd edib ki, həmin şəxslərin 6 228 nəfərinin talassemiya daşıyıcısı, 71 nəfərdə İİV infeksiyası, 328 nəfərdə isə sifilis olduğu müəyyən edilib.   

"Həmçinin 48 cütlükdə, yəni həm oğlanda, həm də qızda talassemiya aşkarlanıb. Lakin xəstəlik aşkarlandıqdan sonra nə qədər şəxsin evlənməkdən imtina etməsi haqqında informasiya bizdə hələlik yoxdur. Talassemiya daşıyıcısı olan 4 cütlükdə hamiləlik aşkarlandığı üçün onlar müayinə olunublar. Bir qadın əvvəl müayinə olunub, onda hər hansı patalogiya aşkarlanmayıb.

Fevralın 23-də bir hamilə qadın müayinə olunub.

Onun nəticələri yaxın günlərdə bəlli olacaq. Uşaq xəstə olsa yəqin ki, hamiləlik pozulacaq. Digər talassemiya daşıyıcısı 4 hamilə qadınların isə vaxtları yaxınlaşdıqdan sonra müayinə olunacaqlar.   

Onlarda hamiləliyin ilk vaxtları olduğu üçün müayinə olunmaq onlar üçün tezdir. Hamiləliyin pozulması ilə bağlı ciddi qərar verildiyi üçün biz düzgün vaxtı gözləmək məcburiyyətindəyik”.