Sumqayıtda şəhərin orta ümumtəhsil məktəblərinin IX-XI sinif şagirdlərinin iştirakı ilə "Narkotiksiz gənclik - sağlam həyat” devizi ilə maarifləndirici görüşlər davam etdirilir. Tədbir Sumqayıt Şəhər İcra Hakimiyyəti başçısı yanında Narkomanlığa və Narkotik Vasitələrin Qanunsuz Dövriyyəsinə Qarşı Mübarizə üzrə Komissiyanın 2016-cı il üçün nəzərdə tutulmuş Tədbirlər Planına uyğun olaraq şəhər Gənclər və İdman Baş İdarəsi, Təhsil Şöbəsinin birgə təşkilatçılığı ilə keçirilir.

İ.Qayıbov adına 1 nömrəli, C.Səfərov adına 10 nömrəli, M.Quliyev adına 3 nömrəli məktəblərdə, "Təfəkkür” və "İstedad” liseylərində, həmçinin 13, 15 və 25 nömrəli orta ümumtəhsil məktəblərində keçirilən tədbirlərdə Təhsil Şöbəsinin, Polis İdarəsinin, Sumqayıt Rayonlararası Narkoloji Dispanserin, Gənclər və İdman Baş İdarəsinin nümayəndələri narkomaniyaya qarşı mübarizə istiqamətində maarifləndirici söhbətlər aparıblar.

Görüşlərdə İdman və Gənclər Baş İdarəsinin hazırladığı "Narkomaniya bəşəriyyətin bəlasıdır” adlı videoçarx nümayiş olunub.

Sonda mövzu ətrafında şagirdlərlə fikir mübadiləsi aparılıb, suallar cavablandırılıb və iştirakçılara Baş İdarənin hazırladığı bukletlər paylanılıb.