«Azərikimya» İB-nin əməkçiləri baharın gəlişini iməciliklərlə qarşılayırlar.

Martın 5-də «Azərikimya» İstehsalat Birliyinin müəssisələrində 2016-cı ilin ilk şənbə iməciliyi keçirilib. İməcilikdə Etilen-polietilen zavodundan, Təmir-tikinti idarəsindən və Birliyin İdarəetmə aparatından ümumilikdə 300 nəfər əməkdaş iştirak edib.
Böyük ruh yüksəkliyi və bahar əhval-ruhiyyəsi şəraitində keçən iməcilik zamanı Etilen-polietilen zavodunun və Təmir-tikinti İdarəsinin daxili ərazilərində təmizlik-abadlıq işləri aparılıb, əvvəlki iməciliklərdə əkilmiş ağaclara aqrotexniki qulluq göstərilib, dibləri bellənilib, suvarma işləri həyata keçirilib. 
Bununla paralel olaraq Etilen-polietilen zavodunun Qaz və maye karbohidrogenlərin qazlaşdırılması, sıxılması və saxlanılması sahəsinin yaşıllıq zonası üçün ayrılmış ərazisində 800 ədədə yaxın müxtəlif növ meyvə ağacları – albalı, tut, alma, heyva, nar, əncir, ərik, gilanar, badam, xurma və s. əkilib.
Qeyd edək ki, kimyaçılar bu ilin ilk şənbə iməciliyini 20 yanvar şəhidlərinin və Xocalı faciəsinin qurbanlarının əziz xatirəsinə həsr ediblər.
Sumqayıtın sənaye zonasında ekoloji mühitin yaxşılaşdırılmasına və yaşıllığın artırılmasına xidmət edən iməciliklərin yaz mövsümü boyu davam etdirilməsi nəzərdə tutulub.