Zirzəmilərin təmizlənməsi nə vaxta qaldı?
Bu binanın həyətində 2013-cü ilin avqustunda nümunəvi məhəllə salınıb. Söhbət  9-cu mikrorayon 51 saylı binadan gedir. Son illərdə binanın fasadı 2 dəfə rənglənib. Hazırda isə dam örtüyü təmir olunur, yeni çardaq quraşdırılır.
Sakinlərii  narahat edən problem də var. Belə ki, sözügedən binanın zirzəmisi  çirkab suları ilə doludur. Xeberle.com xəbər verir ki, bina sakinləri bununla bağlı sumqayitxeber.com saytına məktub yollayıblar. 
Məktubda qeyd olunur ki, bu çirkab sularının üfunəti nəinki mənzillərdə hiss olunur, hətta səki ilə gedən sakinləri də narahat edir. Belə çirkab sularının necə antisanitariya mühiti yaratdığını təsvir etməyə ehtiyac qalmır, amma bu suların binanın özülü üçün necə təhlükəli olduğunu bütün sakinlər başa düşür və haqlı narahatlıq keçirirlər. Ona görə də, 2013-cü ildə məhəllədə abadlıq işləri aparılarkən bu binanın sakinləri rəsmi şəxslərdən təkidlə xahiş edirdilər ki, abadlıq işlərinə binanın zirzəmisinin təmizlənməsi ilə başlasınlar. Zirzəmi sonda təmizlənib qurudulacaq – deyərək sakinləri ümidləndirdilər. Sonunu gün isə – zirzəmini Sukanal idarəsi yaxın vaxtlarda təmizləyəcək – dedilər. Artıq 3-cü ildir ki, Sukanal idarəsindən bu əraziyə gələn yoxdur. Binanın özülü sıradan çıxıb qəza vəziyyəti yarananda nə rəngli fasadın, nə də bəzəkli dam örtüyünün bir köməyi olmayacaq. Bina tikintisi möhkəm özüldən başlandığı kimi təmirin də özüldən başlanması daha məntiqli olardı.
Bina sakinləri ümid edirlər ki, son aylar binaların zirzəmiləri ilə bağlı görülən işlər nəhayət ki,  9-cu mikrorayon ərazisində yerləşən 51 saylı binaya da çatacaq.