Xeberle.com mart ayı ərzində Sumqayıt şəhər sakinlərinin Prezident İlham Əliyevə yazdığı məktublardan bir neçəsinin mətnini təqdim edir.

Prezidentin rəsmi saytında yerləşdirilmiş məktublarda Prezident İlham Əliyevin Sumqayıta olan diqqət və qayğısından, şəhərimizin gündən-günə gözəlləşməsindən, şəhərin məhəllə və mikrorayonlarında həyata keçirilən abadlıq-quruculuq işlərindən razılıq ifadə olunur.

Prezidentin rəsmi saytında yerləşdirilmiş məktublardan bir neçəsinin mətnini təqdim edirik:

Şahsənəm Məmmədova və Humay Ramazanovadan:

Hörmətli cənab Prezident!

Müəllim əməyinə verdiyiniz yüksək dəyər bu peşə sahiblərinə olan böyük hörməti, təhsilə ayrılan diqqəti bütövlükdə Azərbaycan xalqına bəslənən məhəbbəti özündə təcəssüm etdirir.

"Təhsil müəssisələrində çalışan işçilərin əməkhaqlarının artırılması haqqında” 2016-cı il 18 yanvar tarixli Sərəncamınız da bu diqqət və qayğının növbəti nümunəsidir. Təhsil işçilərinin sosial müdafiəsinin gücləndirilməsi məqsədilə atılan addımlar müəllimləri gündəlik qayğılardan uzaqlaşdırır, onların öz fəaliyyət sahələrində səmərəli axtarışlar aparmasına və əldə edilən yeni biliklərin gənclərə öyrədilməsinə şərait yaradır.

Əziz və sevimli Prezidentimiz, xalqın gələcəyi hesab etdiyimiz təhsilə göstərdiyiniz diqqətə görə Sumqayıt şəhərinin 42 və 43 nömrəli orta məktəblərinin kollektivləri adından Sizə dərin minnətdarlığımızı bildirir, Ulu Tanrıdan uzun ömür, möhkəm cansağlığı diləyirik. Biz həmişə Sizinləyik.

Əfrayıl Mikayılovdan:

Hörmətli cənab Prezident!

Dünyanı bürüyən iqtisadi böhran bir çox ölkələri tənəzzülə uğratsa da, Azərbaycana bir o qədər də təsir etmədi. Sizin dediyiniz kimi, "biz bu vəziyyətdən minimum itkilərlə çıxmağı bacardıq”.

İmzaladığınız fərman və sərəncamlarla əməkhaqqıları və pensiyalar artırıldı, abadlıq-quruculuq işləri davam etdirildi. Respublikanın müxtəlif bölgələrində yolların, mədəni-məişət obyektlərinin təmir və tikintisi üçün mütəmadi olaraq lazımi vəsait ayırırsınız. Bu hal Sumqayıt şəhəri üçün də səciyyəvidir. Şəhərimizdə yaşayış binalarının dam örtükləri və liftləri yenilənib, abadlıq işləri həyata keçirilməkdədir. Xüsusilə yeni liftlərdən istifadə insanlara rahatlıq gətirib.

Əziz Prezidentimiz, bütün bunlar Sizin ölkə vətəndaşlarına, o cümlədən biz sumqayıtlılara olan diqqət və qayğınızı bir daha nümayiş etdirir. Buna görə Sizə dərin minnətdarlığımızı bildirir, "Çox sağ olun” deyirik.

Elşad Babayevdən:

Hörmətli cənab Prezident!

Dünyada hökm sürən iqtisadi böhranın Azərbaycana təsirinin minimuma endirilməsi istiqamətindəki fəaliyyətinizi ürəkdən dəstəkləyirik. Sizin rəhbərliyinizlə iqtisadiyyatımızın daha da inkişaf edəcəyinə, xalqımızın rifahının daim yüksələcəyinə əminik.

Son vaxtlar şəhərimizdə aparılan abadlıq və quruculuq işləri yaşadığımız 11-ci mikrorayonda da müşahidə edilməkdədir. Belə ki, binaların və məhəllələrin işıqlandırma sisteminin yenilənməsi, məhəllələrdə hasarların sökülərək uşaqlar üçün oyun sahələrinin genişləndirilməsi bizi çox sevindirir.

Möhtərəm Prezident, bütün bu işlərə görə Sizə dərin minnətdarlığımızı bildirir, çətin və şərəfli işinizdə uğurlar arzu edirik.