Şəhərimizin Heydər Əliyev prospekti – "Kimyaçılar” mədəniyyət evinin yaxınlığındakı məşhur ölüm saçan döngəsindən çoxunun xəbəri var. Əvvəl ora avtomobil yolu olub. Lakin sonradan təmir işləri aparılıb, mədəniyyət evinin qabağına piltə daşlar döşənib, avtomobil yolu yığışdırılıb və meydan düzəldilib. Həmin gündən də sözügedən döngə çevirilib olub "ölüm döngəsi". O gün olmur ki, burda qəza olmasın. Bunun da səbəbi sadədir. Qeyd etdiyimiz kimi, əvvəl bura avtomobil yolu olub. Bundan başqa, parkın 9-cu mikrorayon tərəfdə olan maşın yolunun işıqları və ordan keçən avtomobillər bu başdan elə görüntü yaradır ki, sanki "Kimyaçılar” sarayının da qabağı açıqdır. Məhz bu amil də sürücüləri çaşdırır.
Elə iki gün öncə gecə saatlarında həmin döngədə növbəti ağır yol qəzası baş verib. Sürətlə hərəkət edən avtomobil döngəni dönərkən yenə hündür bardürə çırpılıb. Dərhal ətrafdakı insanların köməyi ilə sürücü avtomobildən çıxardılıb. Xoşbəxtlikdən sürücü ağır bədən xəsarəti almasa da, şok keçirdiyi hiss olunurdu. Dərhal hadisə yerinə yol polisinin və post patrul xidmətinin əməkdaşları gəlib.
Doğrudan da bu yolla bağlı təcili tədbir görülməlidir. Əslində baş verən bir neçə qəzadan sonra bu yola tramplin qoyulmuşdu, lakin 2014-cü ildə "Tour d'Azerbaïdjan-2014 velosiped yarışı keçiriləndə tramplin söküldü sonradan da bərpa olunmağı yaddan çıxdı. Qəzalar yenidən artdı.
Əlqərəz, ya həmin döngənin qarşısındakı yol birdəfəlik açılmalıdır, ya da yolun həmin hissəsinə sürücülərə kömək üçün gecələr sayrışan xüsusi yol nişanı qoyulmlıdır.
Yoxsa daha dəhşətli, daha ağır qəza - insan itkisi olsun sonra tədbir görülsün?!
Elnur Ağayev
Xeberle.com