Azərbaycan Hava Yolları" (AZAL) 9 May - Böyük Vətən müharibəsində Qələbənin 71-ci ildönümünə həsr olunmuş yeni aksiyanın başlanmasını elan edir. 
Aksiya çərçivəsində Sovet İttifaqı qəhrəmanları və SSRİ Şöhrət Ordeninin 3 dərəcəsi ilə təltif olunan şəxslər, I, II və III qrup Böyük Vətən müharibəsi əlilləri və iştirakçıları, Böyük Vətən müharibəsində yaralanan, kontuziya alan və həlak olan hərbi qulluqçuların dul arvadları AZAL-ın marşrut şəbəkəsinin istənilən istiqamətinə pulsuz aviabilet əldə edə biləcəklər.
Aksiya çərçivəsində pulsuz aviabilet həmçinin onları müşayiət edən bir sərnişin üçün də nəzərdə tutulub. Aksiya çərçivəsində aviabiletlərin rəsmiləşdirilməsinə 11 aprel tarixindən başlanılacaq. Gediş tarixi mayın 3-dən 12-dəkdir. Geri dönüş tarixi isə sərnişinlərin istəyindən asılıdır. 
AZAL QSC-nin vitse-prezidenti Eldar Hacıyev bildirib ki, İkinci Dünya müharibəsində Qələbənin qazanılmasında Azərbaycan xalqının böyük xidməti var:"Biz bu qələbəni bizə hədiyyə edənlərə böyük hörmətlə yanaşırıq. Azərbaycanın milli aviadaşıyıcısı üçün veteranlara uçuşlar yerinə yetirdiyimiz istənilən şəhərdə olmaq imkanı yaratmaq böyük şərəfdir”.
Veteranlar aviabiletləri AZAL-ın kassalarında, həmçinin aviaşirkətinin xarici dövlətlərdəki nümayəndəliklərində rəsmiləşdirə bilərlər. Bu aksiya çərçivəsində aviabilet əldə etmək üçün Böyük Vətən müharibəsi veteranları kateqoriyasına mənsub olduğunu təsdiqləyən sənəd təqdim olunmalıdır.  
Azərbaycanda dəqiqləşmiş son statistikaya əsasən 1291 nəfər Böyük Vətən müharibəsi veteranı yaşayır.  
Respublikanın iki rayonunda Böyük Vətən müharibəsi veteranı qalmayıb. Bunlar Beyləqan və Xocavənd rayonlarıdır (rayonun işğal altındakı ərazilərində yaşayan erməni əhalisi nəzərə alınmamaqla).  
Ən az veteran Xızı (2 nəfər), Xocalı (2 nəfər) və Şirvanda (3 nəfər) yaşayır. Rayonlar arasında hazırda həyatda olan Böyük Vətən müharibəsi veteranlarının sayına görə Gədəbəy rayonu ilk sırada dayanır.   
Uzunömürlü sakinlərinin sayına görə də Azərbaycanda ilk yerdə olan Gədəbəydə 55 Böyük Vətən müharibəsi veteranı həyatdadır. Sağ qalan veteranların sayına görə, bölgələr arasında sonrakı yerlərdə Şəmkir (43 nəfər), Gəncə şəhəri (30 nəfər), Ağstafa (28 nəfər) və Sumqayıt (28 nəfər) gəlir.  
Naxçıvan Muxtar Respublikasında isə hazırda 66 nəfər Böyük Vətən müharibəsi veteranı sağdır.  
Bakı şəhərində 312 nəfər Böyük Vətən müharibəsi veteranı həyatdadır.  
Paytaxtın Xətai rayonunda 58, Nəsimi rayonunda 44, Yasamal rayonunda 44, Nərimanov rayonunda 42, Sabunçu rayonunda 31, Nizami rayonunda 28, Suraxanı rayonunda 25, Binəqədi rayonunda 25, Səbail rayonunda 9, Qaradağ rayonunda isə 6 nəfər Böyük Vətən müharibəsi veteranı yaşayır. 
teleqraf.com