Bu gün Sumqayıtda Qələbə günü münasibətilə Böyük Vətən Müharibəsində həlak olanların xatirəsinə ucaldılmış abidənin önündəki meydanda ümumşəhər tədbiri keçirilib.
Tədbir iştirakçıları Böyük Vətən Müharibəsində həlak olanların xatirəsini bir dəqiqəlik sükutla yad ediblər. Sumqayıt Şəhər İcra Hakimiyyətinin başçısı Zakir Fərəcov şəhərin hüquq mühafizə orqanlarının, müəssisə və təşkilatlarının rəhbərləri, habelə ictimaiyyətin nümayəndələri abidə önünə çiçəklər qoyublar. Azərbaycan Respublikasının Dövlət Himni səslənib.
Sovet xalqı 71 il əvvəl faşist Almaniyası ilə müharibədə möhtəşəm qələbə qazanıb. Hər il Qələbə günü ənənəvi olaraq veteranlar, müharibədə iştirak etmiş sumqayıtlılar bir yerə toplaşır, həmin o qanlı-qadalı günləri xatırlayırlar.
Sumqayıt Şəhər İcra Hakimiyyətinin başçısı Zakir Fərəcov veteranlarla görüşüb, onları şanlı bayram münasibətilə təbrik edib. Müharibənin dəhşətlərindən keçmiş, Sumqayıtın quruculuğunda fəal iştirak etmiş veteranlar şəhərin inkişafı üçün əllərindən gələni ediblər. Veteranlar şəhərin yeni rəhbərliyinin həyata keçirdiyi islahatları bəyəndiklərini və bu planın Sumqayıtın hər bir guşəsində əsaslı dəyişiklərə səbəb olacağına böyük ümid bəslədiklərini bildiriblər.
Tədbir iştirakçıları sonra parada tamaşa ediblər. Paradı nəfəsli alətlər orkestri açıb. N saylı hərbi hissəsinin qulluqçuları Azərbaycanın nəhəng bayrağını meydana gətiriblər. Əsgərlərin nizami cərgələri improviziya olunmuş tribunanın önündən keçiblər. Onların ardınca ən yaxşı məktəb komandaları – respublika "Şahin” hərbi- vətənpərvərlik oyunlarının iştirakçıları marşın sədaları altında addımlayıblar.
Xeberle.com