Ermənistan ordusu Ağdamın Aşağı Qərvənd kəndi istiqamətindəki mövqelərimizi atəşə tutmağa başlayıb. Bu barədə məlumatı cəbhə xəttindəki reportyorumuz Məhəmməd Türkmən verib. Onun sözlərinə görə, 15-20 dəqiqədir həmin istiqamətdən iriçaplı silahlardan açılan atəş səsləri gəlir.
Jurnalistlər qaynar nöqtəyə yaxınlaşmaq istəsələr də, polis postundan keçmələrinə icazə verilmir.
Yarım saat sonra müxbirimiz musavat.com-la əlaqə saxlayaraq, bildirdi ki, atışma indilik sakitləşib.
Lakin daha sonra atışma yenidən başlayıb. Prosesi təsbit etmək üçün M. Türkmən atışma səslərini videoya alıb və qısa şərhlə musavat.com-a göndərib. Saat 03.30-da intensiv olmayan silah səsləri eşidilirdi.
************************
Saat 05:00
Cəbhə xəttindəki reportyorumuz Məhəmməd Türkmən xəbər verir ki, atışma davam edir. Atışma intensiv olmasa da, hələ də davam etməkdədir. Bu dəfə daha ağır silahlardan istifadə edilir. İşıqlandırıcı fişənglərdən, trasserlərdən və iri çaplı pulemyotlardan istifadə edilir. Qarşılıqlı atışma davam edir.
Musavat.com
Xəbərdən istifadə edərkən istinad etmək vacibdir.
