Sumqayıt şəhəri 4-cü mikrorayon bina 19/27-nin sakinləri ərazidə aparılan tikintidən şikayət edir.

ANS TV-nin məlumatına görə, Sumqayıt şəhər 4 cü mikrorayon bina 19/27-nin sakinlərini bir araya toplayan binanın qarşısındakı ərazidə mağaza tikilməsidir. Binanın qarşısında iki mağaza arasında boş sahə sakinlərin gediş-gəliş yeridir. Yolun qarşısında dayanacaq da qoyulub. Amma digər obyektlərin sahibinin burada da yeni bir mağaza tikdirmək istəməsi sakinləri ayağa qaldırıb. 

Əslində obyekt sahibinin burada tikinti aparmaq istəyi indi yaranmayıb. Əvvəllər də əraziyə dəmir kosntruksiya gətirib qoyublar. Amma sakinlərin etrizaından sonra o yığışdırılıb. Bir müddət keçdikdən sonra yenidən tikinti işlərinə başlanılıb.

Sakinlər isə burada tikinti aparmağa icazə verməyəcəklərini dedilər. Şikayətçi İbrahim Sərxanovun sözlərinə görə onların şikayətlərinə heç kim baxmır. 

Biz də məsələ ilə bağlı ilk olaraq ərazi üzrə 12 saylı Mənzil İstismar Sahəsinə (MİS) yollandıq. Amma deyəsən münasib vaxtda getməmişdik. Bizi görən MİS-in rəisi Fərhad Camalov stuldan qalxıb operatorun üstünə hücum çəkdi.

Amma Fərhad Camalov onu da bilməlidir ki, o, cavabdeh şəxsdir və idarənin qapısını döyən hər kəsə cavab verməlidir. Verilən cavab isə əl-qol atmaq və ya qışqırmaqla olmamalıdır. Yəni MİS-nin rəisinin bu davranışı heç də xoş deyildi.

Biz də dəvədən böyük fil var deyib yollandıq Sumqayıt şəhər icra hakimiyyətinə. Sumqayıt Şəhər İcra Hakimiyyətinin rəsmisi Abid Əliyev bildirdi ki, sakinlər narahat olmasın, orada hər hansı obyektin tikintisindən söz gedə bilməz. 

Hər halda tikintiyə sənədi olduğunu deyən fiziki şəxs də, ona havadarlıq edənlər də İcra rəsmisinin sözünü eşitdi. Yəqin ki, ən yüksək instansiya rəsmisinin sözünü qulaqardına vurmağa heç kim cəhd etməz.