Dünən Sumqayıtdan olan şəhid Abdinov Hüseynin yas mərasimində icra başçısının müavini ilə molla arasında mübahisə yaranıb. Xeberle.com qafqazinfo-ya istinadən məlumat verir ki,  “Stansiya Sumqayıt" qəsəbəsində şəhid məclisində ruhani Bəhruz Əlizadə çıxış edərək, ictimaiyyətdə, marşrutlarda, telekanallarda şəhidlərlə bağlı məlumatların olmamasından nigarançılığını bildirib. Elə bu zaman Sumqayıt şəhər icra başçısının müavini Akif Quliyev ayağa qalxaraq, "a bala, a bala, mövzudan kənara çıxma. Çıxanda söhbət edərik, nə lazımsa, mən sənə çatdıraram. Səni göndərərəm cəbhəyə dolğun məlumat alarsan...", - deyib.

Daha sonra ilahiyyatçı Bəhruz Əlizadə, "baş üstə" deyərək sözünə dua ilə xitam verib. Amma iş bununla bitməyib. Belə ki, Akif Quliyev baş vermiş hadisədən qəzəblənərək ilahiyyatçı ilə bağlı  "mən onu dama basdıracağam" deyib.

Məsələyə şəhidin atası da qarışıb və bildirib ki, heç bir narahatçılıq yoxdur, kimsə mənim qonağımı həbs etdirə bilməz.

Qeyd edək ki, ilahiyyatçı Bəhruz Əlizadə ANS telekanalında "Adam içində" verilişinin ilahiyyatçı ekspertidir.