Xeberle.com xəbər verir ki, Sumqayıt şəhər İcra Hakimiyyətinin təşəbbüsü, şəhər Gənclər və İdman Baş İdarəsinin və Sumqayıt Dövlət Texniki Kollecin birgə təşkilatçılığı ilə bu gün Kollecin akt zalında şəhər Prokurorluğu və Gənclər və İdman Baş İdarəsinin əməkdaşları, Kollecin müəllim-tələbə heyyətinin iştirakı ilə 18 – İyun "Azərbaycanda Milli İnsan Hüquqları” gününə həsr edilmiş növbəti görüş keçirilib.
İlk olaraq iştirakçılara insan hüquq və azadlıqları haqqında videoçarx nümayiş olunub.
Tədbiri giriş sözü ilə açan Sumqayıt Dövlət Texniki Kollecin direktoru Mətanət Pirquliyeva iştirakçıları salamlayaraq, 18 may – 18 iyun "İnsan Hüquqları Aylığı” çərçivəsində şəhərin ayrı-ayrı idarə, müəssisə və təşkilatlarında, ali və orta – ixtissas təhsil müəassisələrində, o cümlədən Sumqayıt Dövlət Texniki Kollecində keçirilən maarifləndirici xarakterli görüşlərdən və 18 – İyun "Azərbaycanda Milli İnsan Hüquqları” gününün əhəmiyyətindən danışıb, ulu öndər Heydər Əliyev tərəfindən 1998-ci il iyunun 18-də "İnsan hüquqlarının müdafiəsinə dair Dövlət Proqramı”nın təsdiq olunması və məhz bu tarixin Azərbaycan Respublikasının Prezidenti cənab İlham Əliyevin 17 iyun 2007-ci il tarixli sərəncamı ilə Azərbaycanda "Milli İnsan Hüquqları günü” elan olunduğunu bildirib.«Azərbaycan Respublikasında insan hüquq və azadlıqlarının müdafiəsinin səmərəliliyini artırmaq sahəsində Milli Fəaliyyət Proqramı»nın icrasının uğurla təmin edilməsindən, Respublikada həyata keçirilən hüquqi dövlət quruculuğu siyasətindən, insan hüquq və azadlıqlarının qorunması istiqamətində görülmüş işlər haqqında ətraflı məlumat verilib.
Tədbirdə Sumqayıt şəhər Prokurorunun böyük köməkçisi Pərviz Əliyev, şəhər Gənclər və İdman Baş İdarəsinin rəis əvəzi Mübariz Bəşirov iştirak edib.
Sonda iştirakçılara Baş İdarə tərəfindən hazırlanmış insan hüquq və azadlıqları haqqında ilkin məlumatları özündə əks etdirən bukletlər paylanıb.