Tədbirdə çıxış edən Baş İdarənin rəis əvəzi Mübariz Bəşirov qeyd etdi ki, Ümummilli Lider Heydər Əliyevin möhkəm iradəsi sayəsində 1994-cü ildə ölkədə atəşkəsə nail olduqdan sonra ordu quruculuğu, hərbi sənayenin inkişafı, gənc zabitlərin yetişdirilməsi istiqamətində əvəzssiz gördüyü işlərdən danışmışdır. Bu gün Ölkə başçısı, Ali Baş Komandan cənab İlham Əliyevin diqqət və qayğısı nəticəsində dövlətimizin etibarlı müdafiəsinin təmin olunması, Azərbaycan Ordusunun regionun ən güclü ordusuna çevrilməsi ilə bağlı ətraflı məlumat vermiş, Silahlı Qüvvələr günü münasibəti ilə şəxsi heyyəti Sumqayıt gəncləri və idman ictimaiyyəti adından təbrik etmişdir.

Böyük vətən müharibəsinin iştirakçısı, şəhər Veteranlar Şurasının fəxri veteranı MirMəhəmməd Əliyev, Azərbaycan Vətən Müharibəsi Veteranları Birliyinin Sumqayıt şəhər şöbəsinin sədr müavini Zəkəriyyə Rəhimov çıxışlarında Ali Baş Komandan cənab İlham Əliyevin rəhbərliyi ilə son aprel döyüşlərində rəşadətli Azərbaycan ordusunun düşmənə layiqli cavab verərək bir sıra yaşayış ərazilərini və yüksəkliyi azad etməsini qeyd etmişlər.

Hərbi hissə komandiri Fərman Hümbətov hərbi hissəyə göstərilən diqqət və qayğısına görə ölkə və şəhər rəhbərliyinə dərin minnətdarlığını bildirmiş, dövlətin etimadını bundan sonra da layiqincə doğruldacaqlarını vurğulamışdır.

Tədbirin bədii hissəsində gənc müğənnilər İlkin Əlizadə, Zaur Yusifli, meyxana ustaları Ehtiram Sumqayıtlı və Elnur Ağdamlı, Uşaq və Yeniyetmələrin Yaradıcılıq Mərkəzinin "Ümid” rəqs qrupu maraqlı musiqi nömrələri ilə çıxış etmişlər.

Sonda hərbi hissəyə Baş İdarənin hədiyyələri təqdim edilmişdir.