Bu gün Onun doğum günüdür. Aprel döyüşlərində şəhid olan gizir Seymur Baxışovun.  Yaşasaydı, 29 yaşı tamam olacaqdı. Amma nəsib olmadı. Çünki canından artıq sevdiyi Vətən torpağını qanı ilə suvarmağı özünə borc bildi...
Seymur Baxışovun anım gününü valideynləri və dostları , Sumqayıt ictimaiyyəti Şəhidlər xiyabanında qeyd edib.  Tədbirdə  bildirilib ki, torpaqlarımızın qorunması, vətənimizin müdafiəsi uğrunda canından, qanından keçərək şəhidlik zirvəsinə ucalmaq ən böyük şərəf və qürurdur. Vurğulanıb ki, şəhidlik zirvəsinə ucalanların xatirəsini yaşatmaq, onları gəncliyə nümunə göstərməksə, hər kəsin vətəndaşlıq borcudur.
Qeyd edək ki, Baxışov  Seymur  Qulamhüseyn oğlu 12 iyul 1987–ci ildə Sumqayıt şəhərində anadan olub. S. Baxışov  1994-2003-ci illərdə 14 saylı orta ümumtəhsil məktəbinin rus bölməsində oxuyub. 2003-2005-ci illərdə Sumqayıt şəhər "Təfəkkür” liseyində  təhsil alıb.  O, 2006-cı ildə  həqiqi hərbi xidmətə çağırılıb.  2006-2007-ci illərdə  Xüsusi Təyinatlı Qüvvələr kursunu keçərək N saylı hərbi hissədə xüsusi təyinatlı qrupun kəşfiyyatçı "istehkamçı” vəzifəsinə təyin olunub. 20 yaşlı Seymura 12 iyul 2007-ci ildə "kiçik gizir” hərbi rütbəsi verilib. O, 26 iyun 2008-ci ildə Azərbaycan Respublikası Müdafiə Nazirinin əmrinə əsasən Silahlı Qüvvələrin yaranmasının "90  illiyi” (1918-2008) yubiley medalı ilə təltif edilib.
Şəhid  olan günə qədər Xüsusi Təyinatlılarda istehkamçı olub.
Xeberle.com

Xəbərdən istifadə edərkən istinad etmək vacibdir.