"Azərbaycanda 8 000-ə qədər vərəm xəstəsi qeydiyyatdadır.”
Bunu Elmi-Tədqiqat Ağ Ciyər Xəstəlikləri İnstitutunun direktor müavini İradə Axundova deyib. Onun sözlərinə görə, onlardan 4 000-dən bir qədər artığı yeni xəstədir:
"2015-ci ildə ölkədə 100 000 nəfərə 3,8 insan vərəmə görə həyatını itirib. Ağ ciyər xəstəlikləri, əsasən vərəm xəstəliyi iqtisadi duruma bağlı xəstəlikdir. Biz iqtisadi cəhətdən yüksək vəziyyətdə olan ölkələrə yaxınlaşdığımız üçün vərəmə xəstələnmə, vərəmdən ölüm əhali arasında azalıb”.
İradə Axundova bildirib ki, xəstələnmə 100 min əhalidə 2011 ci ildə 55 nəfər idisə hazırda bu rəqəm 40-a yaxındır: "Vərəmə yoluxma üçün ən aktiv inkişaf 20 -40 yaş dövrüdür ki, insanlar bu yaş dövründə bu xəstəliyə yoluxurlar”.
Direktor müavini vərəm xəstləiyinin hansı regionlar üzrə daha çox müşahidə olduğunu açıqlayıb: "Şimal və cənub rayonlarımızda vərəm xəstəliyi Bakı və mərkəz rayonlara nisbətən çoxdur. Qeyd edim ki, bütün rayonlarda eyni iş aparılır”.
Direktor müavini qeyd edib ki, son 5 ildə ölkədə vərəm xəstəliyinin dinamikasında müsbət dəyişikliklər qeydə alınıb: "2010-cu ildə 100 000 nəfərə 53,5 xəstələnmə var idisə, 2015-ci ildə bu 100 000 nəfərə 41,3-dək azalıb. Ümumilikdə ölkə üzrə ocaqlı vərəm formalarının artması, infiltrativ vərəm formalarının azalması, gecikmiş, yayılmış vərəm formalarının sayında isə stabilləşmə müşahidə olunur. Son illər ərzində uşaqlar və yeniyetmələr arasında xəstələnmənin azalması müşahidə olunur”.
azvision.az
Xəbərdən istifadə edərkən istinad etmək vacibdir.
