Sumqayıt şəhərində parkda düzəldilmiş böyük şahmat lövhəsi burada istirahət edən şəxslərin böyük marağına səbəb olur. Gün ərzində parka gələn onlarla adam bu böyük şahmat “taxtası”nda “at sürüyür”.

Biz parkdakı bu şahmat lövhəsi olan yerə çatanda artıq bir oyun başa çatmışdı. Yerli “qrossmeysterlər” yeni oyun üçün fiqurları təkrar düzürdü.

Özlərinə müəllim saydıqları şəxs isə az öncə uduzan oyunçuya təsəlli verirdi: "Eybi yox, gələn səfər udarsan".

Burada şahmat oynayan müəllim Əli Hüseynov deyir ki, lövhə təxminən bir il əvvəl icra hakimiyyəti tərəfindən düzəldilib. Şahmat həvəskarları hər gün gəlib burda vaxtlarını keçirir.

Buradakı fiqurlar gecələr də parkda qalır. Təbii ki, parkın mühafizəçilərinin nəzarətində. Nəzarətçilər şahmat meydanını daha çox ona görə yoxlayır ki, fiqurlar sındıqca, düzəltdirib gətirsinlər. Fiqurlar külək aparmasın deyə, ağır düzəldiblər. Ona görə də sürüyəndə arada sınır. Ancaq fiqur sındığına görə oyunçulara bir şey deyilmir. Bütün xərcləri icra hakimiyyəti özü ödəyir.

Müsahibimiz onu da deyir ki, bəzən burada icra hakimiyyəti və bələdiyyənin təşkilatçılığı ilə kubok yarışları keçirilir.

Vüqar Kamil,/ailem.az/