“Özünü Azərbaycanlı hesab edən şəxs heç zaman dövlətinə qarşı pis xəbər yaymaz və nəyəsə görə, vətənin sirrini faş etməz”

Bu sözlər tarix elmləri doktoru, professor, Milli Məclisinin deputatı Musa Qasımlıya məxsusdur. O, XeberLent.az informasiya agentliyi vasitəsi ilə bəzi “jurnalistlərin” nəyəsə xatir öz vətəninin sirlərini düşmənə açıq-aydın satmaqda ittiham edərkən deyib:

“Yanlış məlumat verənlər, yanlış ictimai rəy və saxta tarix formalaşdırırlar. Çox əfsuslar olsun ki, bu cür “jurnalistlərin” ölkəmizdə çox olduğunun şahidi olduq. Avqust ayında mənfur düşmənlərimizlə baş vermiş atışmalar zamanı jurnalistlər ağıllarına nə gəldi yazdılar. Cəbhə ilə bağlı 11 əsgərin öldüyü bildirilir, lakin adlar qeyd edilmir. Azərbaycanda hər iki ailədən birinin övladı əsgərdir, bu ailələri necə intizarda qoya bilərlər? Jurnalistlər cəbhə xətti ilə sərhəddi bir-birindən ayıra bilmirlər. Bu da jurnalistlər arasında ixtisaslaşma olmamasını göstərir. Hər sahə üzrə ayrı-ayrı jurnalist yazmalıdır. Çox üzr istəyirəm, genekologiyadan yazan jurnalist, daha sonra hərbidən yazır. Mətbuatın azad olması, hələ hər şeyi yazması demək deyil...

 - Musa müəllim, buyurdunuz ki, “jurnalistikada böyük problemlərimiz var və bunun üzərində işlənilməlidir”. Problemdən çıxış yolunu nədə görürsüz?“

 "Sadalanan problemlərin həlli üçün jurnalistlər məsuliyyəti dərk etməli və ixtisaslaşma olmalıdır. İnkişaf etmiş dövlətlərin praktikasına nəzər salsaq görərik ki, böyük dövlətlər mütəmadi olaraq jurnalistlərlə tez-tez ünsiyyətdə olur və nöqsanları aradan qaldırırlar. Bundan başqa, jurnalistlərlə mütəmadi olaraq, treninqlər keçirilməlidir. Əgər hansısa jurnalist və KİV nümayəndəsi bütün bunlardan sonra bir daha dövlətinə əks yazılar yazsa, o zaman o, məsuliyyətə cəlb olunmalıdır”.

 - Bu danılmaz bir faktdır ki, bəzi saytlar, qəzetlər və hansısa jurnalistlər qrantlar, qıraqdan gələn maddi dəstək hesabına fəaliyyət göstərirlər. Bu da sonluqda özünün mənfi təsirini göstərir. Bu cür neqativ halların qarşısını almaq üçün dövlət nə kimi işlər görməlidir?

 “Bəli, çox düzgün vurğuladınız, bu gün belələri az deyil. Ancaq özünü azərbaycanlı hesab edən şəxs heç zaman dövlətinə qarşı pis xəbər yaymaz və nəyəsə görə, vətəninin sirrini faş etməz. Əgər hansısa sayt, qəzet və digər KİV nümayəndələrinin maddi problemi varsa, bu o demək deyil ki, o, vətəninə, xalqına əks fikirli olan birinin puluna aldanaraq onun dedikərini yazmalıdır. Əgər onların maddi problemi varsa, gərək onlar  reklam ilə özlərinin maddi bazasını gücləndirsinlər. Bundan başqa, dövlətimiz medianın inkişafı üçün lazım olan tədbirləri  görür.