Azərbaycanda son illər ailə münaqişələri səbəbindən baş verən cinayətlərin sayı artmaqdadır. Kişi ilə arvadın sözlərinin çəp gəlməsi, qısqanclıq, yaxud başqa səbəblər nəticəsində baş verən bu cinayətlər bəzən bir ailənin faciəsinə çevrilir. Azərbaycanda ailə faciəsinə səbəb olan intiharlar da qeydə alınır. Bu hadisələrin də baş verməsi müxtəlif səbəblərlə bağlı olur. Bəzən arvadını döyən, yaxud güllələyən kişilər öz həyatlarına da son qoyur, yaxud buna cəhd edirlər. Qeyd edək ki, ölkəmizdə baş verən bu qəbildən olan intiharların əksəriyyəti kişilərin payına düşür. Qadınlara gəldikdə, onlar çox vaxt ailədaxili problemlərdən cana doyanda, yaxud sevgi uğursuzluğu ilə üzləşəndə intihara cəhdləri ilə diqqəti özlərinə cəlb etmək istəyirlər. Bu, təkcə Azərbaycanda belə deyil. Dünya ölkələrinin əksəriyyətində kişilərə nisbətən hər hansı problemlə üz-üzə qalan xanımlar daha çox intihara cəhd edirlər. 

Modern.az saytı rəsmi mənbələrin məlumatlarına əsaslanaraq, 2013-cü ildə ailədaxili narazılıqlar, ailədə baş verən hər hansı hadisə nəticəsində depressiyaya düşən, yaxud sevgi uğursuzluğu ilə üzləşən həmvətənlərimizin intihar və buna cəhdləri ilə bağlı araşdırma aparıb. İl boyu 25 nəfərin intihar etdiyi məlum olub. Onların 16-sı kişi, qalanı qadındır. Cəhdlərə gəldikdə, qeyd etdiyimiz kimi qadınlar üstünlük təşkil ediblər. 2013-cü ildə 14 qadın, 12 kişi həyatına qəsdə cəhd edib. Ən çox intihar və intihara cəhd isə Gəncə şəhərində qeydə alınıb. Burada 6 qadın və 4 kişi həyatına müxtəlif vasitələrlə son qoyub, yaxud buna çalışıb.

Əri ilə dalaşıb özünü öldürüb

Şamaxı rayonu, Göylər kənd sakini, 37 yaşlı Şövqə Mikayılova siçan dərmanı adlandırılan arsen turşusu içərək özünü zəhərləyib. O, xəstəxanaya yerləşdirilsə də, dünyasını dəyişib. Məlum olub ki, qadın həyat yoldaşı Cəlal Qurbanovla dalaşdıqdan sonra intihar qərarına gəlib. Ş.Qurbanova ilə həyat yoldaşı arasında yaranmış münaqişədən sonra ailə başçısı evdən gedib. C.Qurbanov baş götürərək kəndi tərk edib. Qadın isə baş verənlərə dözməyərək intihar etmək qərarına gəlib. Onların 3 uşağı qalıb.

Şamaxı rayonunun Quşçu kənd sakini, 51 yaşlı Gülhəsən Şeydayev ailə münaqişəsi zəminində həyat yoldaşı, 48 yaşlı Pakizə Şeydayevanı döyərək ona küt alətlə ağır bədən xəsarətləri yetirib. Gülhəsən Şeydayev həyat yoldaşının aldığı xəsarətlərdən öldüyünü zənn edərək ov tüfəngi ilə özünü güllələyib. O, ürək nahiyəsindən aldığı yaradan dünyasını dəyişib, iki uşaq anası olan qadın isə ağır vəziyyətdə səstəxanaya yerləşdirilib.

Qaradağ rayonu, Lökbatan qəsəbəsində yaşayan 46 yaşlı Şahin Vəliyev ailə münaqişəsi zəminində damarlarını kəsərək intihar edib.

Cəlilabad rayonu, Babalı kənd sakini, 20 yaşlı Tünzalə Şahbazova yaşadığı evin həyətindəki tövlədə özünü asıb. O 2 aya yaxın imiş ki, qonşu Lallar kəndindən Babalı kəndinə gəlin köçüb.
Mərhumun yaxınlarının verdiyi məlumata görə, xaraktercə sakit qız olan Tünzalə ailə münaqişəsi zəminində canına qəsd edib.

Ağcabədi rayonu, Rəncbərlər kənd sakini Faiq Əsgərov üstünə benzin tökərək özünə od vurub və aldığı yanıq xəsarətlərindən dünyasını dəyişib. 58 yaşlı kişinin bu dəhşətli intiharına ailə münaqişəsinin səbəb olduğu bildirilib.

Sabunçu rayonu, Bakıxanov qəsəbəsində yaşayan, 38 yaşlı Fərəh Musayeva yaşadığı evdə özünü asıb. Məlum olub ki, xəstəxanalardan birində tibb bacısı işləyən 38 yaşlı Fərəh Musayeva uzun müddətdir ailəsində hökm sürən dava-dalaşa son nöqtəni bu cür qoyub. Onun əri ilə davadan sonra özünü öldürdüyü bildirilib.
F.Musayevanın həyat yoldaşı ilə ciddi münaqişələri olurmuş. Belə ailə söz-söhbətlərindən bezən qadın hətta bir dəfə damarlarını da doğrayıb. Bu hadisədən sonra ailə münaqişəsi bir müddət səngisə də, yenidən daha da artıb. Ərinin təzyiqlərindən bezən F.Musayeva özünü yaşadığı mənzildə oğlunun turnikindən asıb.

Hacıqabul rayonu, Abdulabad kənd sakini, 49 yaşlı Əlisahib Dəmirov ailə münaqişəsi zəminində həyat yoldaşı, 49 yaşlı Kafiyə İsmayılovanı ov tüfəngi ilə güllələyib. Ə.Dəmirov daha sonra silahla özünü vurub. Onların hər ikisi aldığı güllə yarasından keçiniblər.
Xətai rayonunda kirayənişin yaşayan Hərbi Dəniz Qüvvələrinin müddətdən artıq xidmət keçən hərbi qulluqçusu, 22 yaşlı İbrahim Qafarov özünü asaraq intihar edib. Hadisənin ailə münaqişəsi zəminində baş verdiyi bildirilib.

Lənkəran şəhərində yerləşən Müdafiə Nazirliyinin N saylı hərbi hissəsinin leytenantı, 24 yaşlı Elşən Sərxanlı özünü yaşadığı hərbi şəhərciyin həyətindəki ağacdan asıb. Hərbçinin asılı vəziyyətdə qalmasını görən sakinlər onun həyatını xilas edərək xəstəxanaya yerləşdiriblər.
Onun ailədaxili problemlər üzündən həyatına qəsd etdiyi bildirilib.

41 yaşlı Quba rayon sakini Veysəl Babayev həyat yoldaşı, 48 yaşlı Sevda Mehdiyevanı ov tüfəngi ilə qətlə yetirib. Daha sonra V. Babayev özünü də ov tüfəngi ilə vuraraq intihar edib. Hadisənin motivi açıqlanmayıb

55 yaşlı Sabirabad rayon sakini Qismət Əliyevin meyiti Kür çayının Şirvan şəhərindən keçən hissəsində tapılıb. Bundan iki gün öncə Sabirabad rayonunun Ətçələr kəndindəhəmyaşıdı olan  həyat yoldaşı Sevil Əliyevanı bıçaqlayaraq qətlə yetirən kişi intihar edibmiş.

Ailəsini itirən kişi özünü güllələyib 

Tovuz rayonu, Qaralar kənd sakini Kamil Məmmədov ov tüfəngindən atəş açaraq özünü öldürüb. Verilən məlumata görə, K.Məmmədovun iki uşağı və həyat yoldaşı bir müddət əvvəl dünyasını dəyişib. Sonra tənha qalan kişi xəstəlikdən də əziyyət çəkirmiş. Onun intihar etməsində də bu amillərin rol oynadığı ehtimal olunur. 

Cəlilabad rayonu, Kazımabad kənd sakini, 20 yaşlı Arzu Mustafayeva özünü dərmanla zəhərləyib. Onun atası Rusiyada yaşayır və bir müddət əvvəl dünyasını dəyişən anası rus əsilli olub. Anası dünyasını dəyişdikdən sonra atası Eldar Mustafayev Arzunu və onun kiçik oğlunu Azərbaycana gətirib. Məlumata görə, Arzu Rusiyada yaşayan atasının yanına getmək istəyirmiş. Buna imkanı olmadığından gənc qız özünü öldürüb.

Yasamal rayonunda, “Qış Bulvarı”nın tikintisi ilə əlaqədar sökülməkdə olan evlərdən birində paytaxtın Bakıxanov qəsəbəsinin sakini, 63 yaşlı Sergey Vasilyev özünü asıb. 
Onun ailəsi tərəfindən atıldığı səbəbindən özünə qəsd etdiyi bildirilib.

Nakam sevgi intiharla nəticələnib
Nərimanov rayonunda yaşayan 26 yaşlı Emin Vəliyev özünü yaşadığı evin həyətində öldürüb. Taksi fəaliyyəti ilə məşğul olan gənc özünü elə avtomobilinin təhlükəsizlik kəməri ilə su çəninin borusundan asıb. Onun ölümünün uzun müddət sevdiyi bir qızla birbaşa bağlı olduğu bildirilib. Onunla evlənməyi planlaşdıran Eminin bütün planlarını qızın valideynləri alt-üst edib. Qızın ona verilməməsindən sarsılan Emin sevgisini özünü öldürməklə sübut edib.

Pirallahı rayonunda 18 yaşlı C.M. evdə damarlarını doğrayıb. Onu qanın içində, huşsuz vəziyyətdə valideynləri tapıb. Gənc dərhal xəstəxanaya yerləşdirilib. Oğlanın intihara cəhd  etməsinə səbəb nakam sevgi məsələsinin olduğu bildirilib.

Yasamal rayonunda yaşayan 21 yaşlı Babək Şahbazov özünü yaşadığı binanın 9-cu mərtəbəsindən atıb. O, aldığı xəsarətlərdən hadisə yerindəcə keçinib. B.Şahbazovun sevdiyi qıza görə intihar etdiyi bildirilib. 

Nərimanov rayonu ərazisində Laçın rayonundan məcburi köçkün, 25 yaşlı Zaur Rəsulov Təbriz küçəsində yerləşən ət dükanının anbarında özünü asaraq  intihar edib. Onun sevdiyi qızdan ayrıldığı üçün intihar etdiyi məlum olub. 

Binəqədi rayonu, Sulutəpə qəsəbəsində Yeni yaşayış massivində 21 yaşlı Mirnemət Kazımov özünü kirayə yaşadığı binanın 17-ci mərtəbəsindən atıb. Bədən Tərbiyəsi və İdman Akademiyasının 4-cü kursunda təhsil alan M.Kazımovun ölümündən əvvəl sevdiyi qıza yazdığı məktub da istintaqçıların əlinə keçib. Onun özünü atdığı eyvanda gənc bir qızın fotosu tapılıb. Fotonun arxasında “Hər şey sənə görədir. Məni yaşamağa qoymadın” məzmunlu sözlər yazılıb. Gənc tələbənin özünü öldürməsinə sevgisinin səbəb olduğu bildirilib.

Polis özünü güllələyib

Nərimanov rayon mühafizə polisinin Əli adlı əməkdaşı öz  xidməti  silahından başına atəş açaraq intihar edib. Mərhumun qonşularının verdiyi məlumata görə, hadisənin ailə-məişət münaqişəsi zəminində baş verib. Belə ki, hadisə baş verən gün anasının məzarını ziyarət edən polis əməkdaşı orada qaynatası və həyat yoldaşı ilə mübahisə ediblər. Bundan sonra, polis evinə qayıdıb və gecə saatlarında canına qəsd edib.

Sevmədiyi oğlana nişanlanan qız intihar edib

Cənub bölgəsində yetkinlik yaşına çatmayan qızların ərə verilməsi son zamanlara qədər ciddi problem olaraq qalırdı. Masallıda 18 yaşlı qızın intiharına səbəb isə digər problemlə bağlıdır. 

Məsələn, rayonunun Qodman kənd sakini Ruhanə Hüseynova sevmədiyi oğlana ərə verildiyi üçün özünə qəsd edib.

Kürdəmir rayonu, Karrar kənd sakini, 18 yaşlı Aytən Hüseynova özünü həyətdəki tikilidə asıb. Məlumata görə, 18 yaşlı qızı kənddə yaşayan bir oğlan sevirmiş. Amma qızın ailəsi onu sevdiyi oğlana verməyib. O da bu səbəbdən özünə qəsd edib.

Telefona gələn mesaj intiharla nəticələnib

Şabran rayonunda yaşayan bir uşaq anası, 27 yaşlı Ramilə Eyvazova özünü Samur-Abşeron su kanalına atıb. Araşdırma zamanı məlum olub ki, gənc qadının mobil telefonuna tanımadığı şəxsdən mesaj gəlib. Həyat yoldaşı bundan qəzəblənərək dava salıb və mesaj yazanın kimliyini araşdırmaq üçün arvadını da götürüb qayınatasıgilə gəlib. Əri tərəfindən danlanan və təhqir edilən Ramiləni valideynləri də danlayıblar. Təzyiqlərə tab gətirməyən 27 yaşlı qadın çıxış yolunu intiharda görüb.

Arvadının ölümündən depressiyaya düşüb özünü asıb

Sabunçu rayonu, Maştağa qəsəbə sakini, 45 yaşlı Mirdiyar Mustafayevin həyat yoldaşı 6 ay əvvəl xərçəng xəstəliyindən düynasını dəyişib. Bundan sonra Mirdiyar Mustafayev depressiyaya düşüb. Maddi sıxıntılar çəkən Maştağa sakini daha sonra özünü də öldürmək qərarına gəlib. Övladları yaşadıqları evin tikilinin tavanından keçən dəmir borudan asılı vəziyyətdə qalmış atalarının meyitini görüncə sarsıntı keçiriblər. Onu da əlavə edək ki, intihar etmiş 45 yaşlı kişinin 3 uşağı qalıb.

Suraxanı rayonu, Hövsan qəsəbəsində, Zeytun sovxozunda yaşayan 19 yaşlı Leyla Nəcəfli yaşadığı evin həyətində özünü asıb. Yaxınları L. Nəcəflinin bir müddət əvvəl həyat yoldaşından ayrıldığını deyiblər. Məhkəmə onun övladının atası ilə qalması barədə qərar verib.  Övladının yoxluğundan depressiyaya düşən L. Nəcəfli buna dözməyərək intihar edib.

Suraxanı rayonu Hövsan qəsəbəsində Qəbələ rayon sakini, 43 yaşlı Mətanət Abdullayeva özünü qardaşı evində 4-cü mərtəbədən atıb. Məlum olub ki, qadının əri ölüb və o, 3 azyaşlı övladı ilə çarəsiz qalıb. Qadın bu səbəbdən depressiyaya düşüb. Qadının qardaşı onu evlərinə apararaq müalicə etdirmək istəyib. Lakin qadın axşam çağı özünü öldürüb.

26 yaşlı Şərur rayonu Yeycə kənd sakini Şirvan Zaxarov Şirvan özünü yaşadığı evin həyətindəki tut ağacından asıb. Araşdırma zamanı məlum olub ki, onun intiharına səbəb həyat yoldaşı ilə dalaşması olub. Hadisə baş verən gün onun həyat yoldaşı ilə aralarında olan mübahisə səbəbindən övladlarını da götürərək ər evini tərk edib. Səhəri isə 26 yaşlı gənci tut ağacından asılı vəziyyətdə tapıblar. 

Qızı ilə mübahisə edən qadın özünü odlayıb

Gəncə şəhər sakini, 44 yaşlı Gülnarə Mahmudovaya yaşadığı yataqxanada 21 yaşlı qızı Ceyhunə Rəfiyeva ilə mübahisə edib və sonra intihar məqsədi ilə üzərinə ağ neft tökərək yandırıb.

Bakının Nizami rayonu, 8-ci kilometr qəsəbəsində yaşayan 52 yaşlı Saleh Babayev binanın damına çıxaraq əlində olan 2 ədəd istifadəyə yararlı qumbara ilə özünü partladacağını deyib. 
Görülən tədbirlər nəticəsində qumbaranı partlatmağa macal tapmadan zərərsizləşdirilib. Onun II qrup əlil olduğu, epilepsiya xəstəliyindəın əziyyət çəkdiyi, hadisənin isə onun ailəsində yaranan mübahisə səbəbindən baş verdiyi bildirilib. 

Gəncə şəhər sakini 41 yaşlı Ceyhun Əliyev evdə əsəbiləşərək özü özünü bıçaqlayıb.

25 yaşlı Gəncə şəhər sakini S. Babayeva ailəsində olan söz-söhbətlərə dözməyərək bir neçə ədəd müxtəlif dərman həbləri içdiyini deyib.

Gəncə şəhərində 32 yaşlı Əflatun Abdıyev qeyri-rəsmi nikahda yaşadığı qadının bacısı Gülnar Nəbiyevanı girov götürərək beşmərtəbəli binanın üçüncü mərtəbəsində əlindəki qumbara ilə özünü və evi partladacağı ilə hədələyib. Məlum olub ki, qeyri-rəsmi ər-arvadın arasında baş vermiş münaqişədən sonra qadın evi tərk edib. Əflatun Abdıyev evə gəlib həyat yoldaşını evdə görmədikdə baldızını girov götürərək həyat yoldaşının gəlməsini tələb edib. Qadın gəldikdən sonra isə Ə.Abdıyev baldızını buraxıb. Polis isə onu zərərsizləşdirməyə müvəffəq olub.

Gəncə şəhərində 20 yaşlı gənc Eşqin Cabbarov ailəsində anası ilə mübahisə edəndən sonra özünə bıçaqla xəsarət yetirib.

Səbail rayonunda yaşayan 29 yaşlı İradə Məhəddinova onunla eyni ünvanda yaşayan keçmiş həyat yoldaşı, 37 yaşlı Kənan Səfərov onu döyüb təhqir etdiyi üçün intihara cəhd edib.

 İ.Məhəddinova Badamdar qəsəbəsində yerləşən parka gedərək, 40 ədəd “Anapirin” markalı dərman içməklə intihar etmək istəyib.

Gəncə şəhər sakini, 26 yaşlı Sarvanə Məmmədova ağır zəhərlənmə diaqnozu ilə xəstəxanaya yerləşdirilib. Həkimlərin səyi nəticəsində qadını xilas etmək mümkün olub. Araşdırma zamanı S. Məmmədova bildirib ki, yaşadığı evdə azyaşlı uşaqlarına əsəbiləşərək sirkə turşusu içib.

Gəncə şəhər sakini, 26 yaşlı Mahir Bayramov yaşadığı evdə qarın nahiyəsindən bıçaqlanaraq şəhər Təcili Tibbi Yardım Xəstəxanasına yerləşdirilib. Araşdırma zamanı məlum olub ki, M. Bayramov evdə böyük qardaşının ona tutduğu iradlardan əsəbiləşərək özünü bıçaqlayıb.

Sevgilisinə əsəbiləşib özünü yandırıb

Yasamal rayonunda 40 yaşlı Lamiyə Allahverdiyeva üstünə yandırıcı maye tökərək özünü yandırıb. Ərazidə olan şəxslər yanan qadın xilas edilib. Lamiyə Allahverdiyeva yanıq xəsarəti ilə xəstəxanaya yerləşdirilib. Ona tibbi yardım göstərilib, vəziyyətinin ağır olduğu bildirilir.

Lamiyə Allahverdiyeva Zabrat qəsəbə sakini, 45 yaşlı Ceyhun Yoldaşov ilə qeyri-rəsmi nikahda yaşayıb. Onların qeyri-rəsmi nikahlarından oğlan uşağı dünyaya gəlib. Bir neçə ay əvvəl Ceyhun Yoldaşovla Lamiyə Allahverdiyevanın münasibətləri korlandığından ayrılıblar. Bundan sonra azyaşlı uşaq anası ilə qalıb.

Sentyabrın 22-də Ceyhun Yoldaşov keçmiş sevgilisinə zəng edərək oğlu ilə görüşmək istədiyini bildirib. Metronun “Nizami” stansiyasının yaxınlığında baş tutan görüşdə Ceyhun anasının xəbəri olmadan azyaşlı uşağı götürərək aradan çıxıb. Sentyabrın 25-də Lamiyəyə zəng edən Ceyhun onunla barışmaq istədiyini bildirib. Lakin Lamiyə barışmaq istəmədiyini, uşağını geri qaytamasını tələb edib. Ceyhun barışıq olmadığı halda uşağı geri qaytarmayacağını deyib. Buna əsəbiləşən L.Allahverdiyeva intihara cəhd edib.

Gəncə şəhər sakini, 31 yaşlı Aynurə Novruzəliyeva ağır dərman zəhərlənməsi diaqnozu ilə Gəncə şəhər Təcili Tibbi Yardım Xəstəxanasının xəstəxananın reanimasiya şöbəsinə yerləşdirilib. Tibbi müdaxilə nəticəsində 31 yaşlı qadının həyatını xilas etmək mümkün olub. Araşdırma zamanı məlum olub ki, A. Novruzəliyev ailəsində yaranan problem nəticəsində təxminən 15 ədəd dərman həbi qəbul edərək intihar etmək istəyib.

Şirvan şəhər sakini İlham Dəmirov intihar məqsədi ilə özünü Şirvan kollektoruna atsa da, sudan çıxarılıb.

İstintaq araşdırması zamanı qohumları deyiblər ki, İlhamın az sonra toyunun başlayacağını və tez bir zamanda bəy libası geyinməli olduğunu deyiblər. Polis şöbəsindən birbaşa toyuna yollanan bəy ailə üzvlərinə əsəbindən özünü suya atdığını söyləyib.

Qayınanasını, sonra özünü bıçaqlayıb

Xəzər rayonunda 52 yaşlı Bəhruz Əliyev  aralarında yaranan mübahisə zəminində keçmiş qayınanası Lyudmila Feyzullayevaya bir neçə bıçaq xəsarəti yetirib. Bundan sonra B. Əliyev özünü bıçaqlayıb.

Daşkəsən rayon sakini, 23 yaşlı Elnarə Əsgərova ailədaxili münaqişə zəminində qaynanası, 56 yaşlı Validə Qədirovanı ayaq nahiyəsindən bıçaqlayıb. Daha sonra gəlin özünün qarın nahiyəsinə bıçaqla zərbə endirib. Hər iki qadın xəstəxanaya yerləşdirilib.

Gəncə şəhər sakini, 24 yaşlı Leyla Salmanova ağır zəhərlənmə diaqnozu ilə xəstəxanaya yerləşdirilib. Araşdırma zamanı məlum olub ki, o, azyaşlı uşaqlarının hərəkətlərinə əsəbiləşərək 10 ədəd naməlum dərman həbi qəbul edib. Ağcabədi rayonu, Muğanlı kəndində yerləşən fermada məskunlaşan Füzuli rayonundan məcburi köçkün, 26 yaşlı Vasif Əhmədov ölümcül vəziyyətdə xəstəxanaya gətirilib. Onun əməliyyatdan ayılandan sonra dediklərindən məlum olub ki, bu vəziyyətə düşməsinə səbəb həyat yoldaşıdır. Dindirmə zamanı V.Əhmədov deyib ki, həyat yoldaşı onu əsəbləşdirərək özündən çıxarıb. Əsəblərinə hakim olmayan gənc çıxış yolunu bıçağı öz qarnına vurmaqda görüb.

Abşeron rayon sakini Vüqar Məmmədov da ailə münaqişəsi zəminində özünü bıçaqlayaraq intihara cəhd edib.

Sumqayıt şəhər sakini, 37 yaşlı Aynur Hüseynova özünü Bakıda Dənizkənarı Milli Park ərazisində dənizə atıb. Parkdakı şəxslər qadını suda boğulmaqdan xilas ediblər.

A.Hüseynova bildirib ki, həyat yoldaşı işləmir və hər gün spirtli içki içir. Bu azmış kimi həyat yoldaşı qadını tez-tez döyüb, zorakılıq hərəkətləri edirmiş.

Xəyanətə dözməyib, özünü çaya atmaq istəyib

İmişli rayonu, Məhəmmədli kənd sakini, 27 yaşlı S.A. intihar məqsədilə özünü Araz çayının üzərindəki körpüdən suya atmağa cəhd göstərib. Lakin qızın qohumları və polis şöbəsinin əməkdaşları söhbətlərdən və psixoloji cəhdlərdən sonra gənc qızı fikrindən daşındıra biliblər.

Məlumata görə, S.A bir müddət əvvəl ailə həyatı qurub. Lakin o həyat yoldaşının başqa qadınla əlaqə saxladığını, görüşdüyünü öyrənib. Həyat yoldaşının daha evə gəlmədiyini görən qız nəhayət özünü öldürmək qərarına gəlib.

Zaqatala rayonunun Qandax kənd sakini, 19 yaşlı Səma Səfərova 7 ədəd parasitamol həbi qəbul edib. Araşdırma zamanı məlum olub ki, qadın dərman içməzdən əvvəl həyat yoldaşı ilə mübahisə edib. Onun həyat yoldaşına tez-tez rayon mərkəzində yaşamağı təkid etdiyi bildirilir.

Şirvan şəhərində yaşayan 16 yaşlı Maya Əliyevanı həmin şəhər sakini, 24 yaşlı Savalan Nəhmədov qətlə yetirib. Savalan axşam üstü sevdiyi qızıın evinə gələrək, onun atası, 55 yaşlı Rahil Əliyevi, anası, 53 yaşlı Aidə Əliyevanı, nəhayət, sevdiyi Mayanı bıçaqla vurub. Hadisəni törədərək qaçan Savalan küçədə özünə də bıçaqla xəsarət yetirib. Yaralılar xəstəxanaya yerləşdirilsələr də, Maya Əliyevanın həyatını xilas etmək mümkün olmayıb.  

Hadisənin baş verməsinə səbəb isə gəncin qızı sevməsi olub. Savalan Nəhmədov həmin gün qızın evlərinə elçi göndərib. Lakin valideynləri qızın kiçik olmasını və hələ oxuduğunu deyərək, elçilərə rədd cavabı verib. Elçilərin “yox” cavabından hiddətlənən Savalan Nəhmədov qızın yaşadığı evə yollanıb. Qapını qzın anası 1960-cı il təvəllüdlü Aidə Şamil qızı Əliyeva açıb. S.Nəhmədov ilk zərbəni qadına endirib. Daha sonra evə girib və qızın atası -ci il təvəllüdlü Rahil Hümbət oğlu Əliyevi bıçaqlayıb. Bu zaman R.Əliyev işdən gələrək yatıbmış. Səs-küyə M.Əliyeva çıxıb və ata-anasını qan içində görüb. Qorxudan küçəyə qaçan M.Əliyevanı evlərindən bir az aralı Savalan yaxalayıb. Qıza bir neçə ölümcül bıçaq zərbəsi endirib. Daha sonra isə özünü bıçaqlayıb.

Gəncə şəhərində yaşayan, 18 yaşlı A. Nağıyeva ağır dərman zəhərlənməsi diaqnozu ilə xəstəxanaya yerləşdirilib. Aparılan müayinələr zamanı məlum olub ki, gənc qız özünü öldürmək məqsədi ilə xeyli sayda müxtəlif tərkibli dərmanlar içib. Gəncə şəhər Baş Polis İdarəsi əməldaşlarının apardıqları tədqiqat zamanı məlum olub ki, 18 yaşlı A. Nağıyeva atası və əmisi tərəfindən ona edilən təzyiqlərə əsəbiləşib və özünü öldürməyə cəhd edib. 

Binəqədi rayonu, Dərnəgül qəsəbəsində yaşayan 29 yaşlı Z.X. damarlarını kəsib. 
Onun intihara cəhd etməsinin səbəbinə gəlincə, bu nakam sevgi ucbatından baş verib. Məlum olub ki, gənc bir müddət əvvəl L.K. adlı bir qızı sevib. Lakin sonradan qız oğlanı sevmədiyini və başqasına ərə gedəcəyini deyib. Daha sonra qız bildirib ki, əgər bir də onu narahat etsə, polisə şikayət edəcək. Gənc sevgilisinin bu münasibətinə dözməyib və özünə qəsd etmək istəyib.

Yasamal rayonu ərazisindəki parkda 22 yaşlı Vəfa Mustafayeva çoxlu dərman qəbul edib. 
İlkin məlumatlara görə, qadın özünü ailədaxili mübahisə zəminində öldürmək istəyib. Qadının valideynləri xəstəxanaya gəliblər. Onlar həkimlərə bildiriblər ki. V.Mustafayeva 1 il bundan əvvəl sevdiyi oğlanla, onların razılığı olmadan qaçıb. Bu səbəbdən də onların bu adda qızları yoxdur. Daha sonra valideynlər xəstəxananı tərk edib. İntihara cəhd edən gənc qadın 8 aylıq hamilə olub.
Ağstafa rayonu, Qırılı kənd sakini, 21 yaşlı Şəfa Məmmədova zəhərli maddə içərək özünü öldürməyə çalışıb. Yaxın qohumlarının sözlərinə görə, Şəfa zəhər içməmişdən öncə həyat yoldaşı ilə mübahisə edib və əri onu döyüb. Bu səbəbdən də 5 il əvvəl ailə həyatı quran gənc qadın intihara cəhd edib.