“İnsanlar bu tikili ilə fəxr edə bilərlər”.

Bakı Avropa Oyunlarının keçiriləcəyi 18 yarış obyekti arasında yeni tikilənlərdən biri də su idman növlərinin keçiriləcəyi Bakı Su İdman Mərkəzidir.

ANS TV  xəbər verir ki, 6 min tamaşaçı tutumu olan kompleksdə, 800-dən çox atlet yarışlarda öz gücünü göstərəcək. Artıq hovuzlarda ilk sınaqların keçiriləcəyi tarix də məlumdur. 

Bakı Su İdman Mərkəzi həmçinin öz unikallığı ilə seçilir.

Layihənin rəhbəri Tom Butçherin sözlərinə görə, Bakı Su İdman Mərkəzi Azərbaycanda bu formada olan ilk tikilidir: “Bu tikili dünyada da unikal sayıla bilər. Ona görə də insanlar bu tikili ilə fəxr edə bilərlər. Hovuzlarda ilk sınaqların isə mart-aprel aylarında keçirilməsi planlaşdırılır”.

Mərkəzin Avropa Oyunlarından sonra insanların istifadəsinə verilməsi də mümkündür. 4 mərtəbədən ibarət olan kompleksdə, restoran, SPA, gimnastika kimi əlavə hissələr də olacaq. Hovuzlardan başqa, 4,5 metr dərinliyi olan hündürlükdən tullanma üçün xüsusi hovuzlar da var. Burada həmçinin, restoran da fəaliyyət göstərəcək. Amma Bakı Su İdman Mərkəzi ərazidə yerləşən yeganə idman kompleksi deyil.

Burada basketbol, çimərlik futbolu, çimərlik voleybolu və su polosu arenaları tikilir. Ümumilikdə Avropa idman oyunlarına atletlər də daxil olmaqla 10 mindən çox xarici qonağın gələcəyi gözlənilir.