Lerik rayon sakini Xalqxeber.Az-ın redaksiyasına məktub ünvanlayıb. Həmin məktubu olduğu kimi təqdim edirik:
Ərim xərçəng xəstəliyindən vəfat etməmişdən əvvəl ev tikməyimiz üçün bəzi materiallar almışdı. Ölüm ona ev tikməyə macal vermədi. Üç uşağımla birllikdə 80 ilə yaxın yaşı olan bir otaqlı köhnə evdə qaldım. Uşaqlarımdan da biri Daun sindromundan əziyyət çəkir. Evimiz yarasız olduğu üçün Prezident İlham Əliyevə, Heydər Əliyev Fondunun Prezidenti Mehriban xanım Əliyevaya, Milli Məclisə və Lerik İcra Hakimiyyətinə ev şəraitimizi normallaşdırmaq üçün müraciət edib yardım istədim. İcra Hakimiyyətimə getdiyim vaxt icra başçısının müavini Habil Məlikov məni məsxərəyə qoyaraq dedi: " Sən xülyalara qapılıbsan. Ev bizlik deyil. Get o şəkildəki sənə ev versin.” Barmağı ilə İlham Əliyevin şəkilinə işarə edərək mənə gülməyə başıladı. Prezidentə və birinci xanıma etdiyim müraciətlərdə isə bildirildi ki, Siz evin tikintisinə başlayın, icra hakimiyyəti də kömək edəcək. Mən də bir az borc-xərclə ərimin aldığı daşları hördürməyə başladım. Amma icra hakimiyyəti sözünün arxasında durmayıb məni köməksiz qoydu. Dəfələrlə icra başçısının qəbulunda olmuşam. Axırda mənə dedi ki, ay qız, maaşımı sənə verim uşaqlarım ac qalsın? Güya ki, bu Rövşən müəllim uşaqlarını maaşla dolandırır. Bir sözlə süründürməçilikləri məni boğaza yığıb. Qışın günündə 3 xəstə uşaqla qalmışam yararsız evdə. Dam yaş, divarlar da nəm. Axırda bu xaraba evə də, özümə də od vurub yandıracam. Ölkə başçısından bir daha xahiş edirəm mənə köməklik göstərilməsinə xüsusi göstəriş versin. İnanıram ki, cənab İlham Əliyev səsimə səs verəcək və məni övladlarımla birlikdə bu qışın oğlan çağında isti yuvamıza qovuşduracaq.
Lerik rayon Günəşli kənd sakini Mövlanova İradə
Xəbərdən istifadə edərkən istinad etmək vacibdir.