Sumqayıt sakini Seymur Şahbazzadə  yaşadığı 13-cü mikrorayon ərazisində faəliyyət göstərən “Çempion” kafesinin fəaliyyətindən narazıdır.  Bu barədə “Xeberle.com”-a danışan S. Şahbazzadə bildirib ki, ev 56a-nın arxa hissəsində 2 beşmərtəbəli və 2 doqquzmərtəbəli binanın  yaxınlığında fəaliyyət göstərən kafe mənzillərin yataq otaqlarının pəncərələrinin açıldığı ərazidədir: “Bununla yanaşı sözügedən kafe məktəb yolunun üstündə yerləşir”.

Şikayətçi  deyir ki,  sahibinin təqaüdə  çıxmış polis olduğu deyilən kafe icarəyə verilib: “Artıq 7 ildir ki bura çayxana və pivəxana kimi fəaliyyət göstərir. Hər gün kafenin qarşısındakı ağaclıqda  stol-stullar düzülür, müştərillərə qulluq edilir. Əsas məsələ axşam saat 11-dən sonra başlanır. Belə ki, kafedə saat 23:00-dan saat 01:00-dək  stolüstü oyunlar- nərd və domino oynanılır. Bir də görürsən bu oyunlar gecənin yarısına kimi davam edir.  Burada yaranan səs-küy binalarda yaşayan insanların narahatçılığına səbəb olur.  Gecə növbəsindən işdən qayıdan insanlar, günortadan sonra istirahət etmək istəyənlər, yaşlılar, qadınlar və uşaqlar bu isti havalarda pəncərələri açıq qoyub yatmaq və dincəlmək imkanından məhrumdurlar".  

S. Şahbazzadə aidiyyatı qurumların bu məsələyə biganəliyindən narahatçılığını da ifadə edib: “Təəssüf ki,  ictimai asayişin, əhalinin dincliyi və sakitliyinin təminatı ilə məşğul olmalı qurumlar və şəxslər “Çempion” kafesi ilə qonşu olmaq bədbəxtliyinə düçar olanların əsəbi və zorən məzlum durumu ilə heç maraqlanmır, lazımi tədbirlər görmürlər”.

Sakin  saytımız vasitəsiylə onu maraqlandıran suallara da cavab tapmaq istəyir: 

1. Həmin tikilinin kafe kimi fəaliyyət göstərməsi qanunidirmi?

2. Oranı nərd-domino oynayan oyunxanaya çevirmək qanunidirmi?

3. Heç bir əziyyət çəkmədən onlara aid olmayan açıq havadakı əraziyə- ağaclığa stol-stul düzəməkləri qanunidirmi?

4. Gecə 00:00-dan sonra kafenin işləməsi qanunidirmi?

Xeberle.com