“Bakı Beynəlxalq Avtovağzal Kompleksi ərazisində inşa olunan metro stansiyası gələn il, Bakıda keçiriləcək ilk Avropa oyunlarına kimi istifadəyə veriləcək.”

Bu barədə İnterAz-a "Bakı Metropoliteni" QSC-nin mətbuat katibi Nəsimi Paşayev məlumat verib. Onun sözlərinə görə, işlərin çox hissəsi artıq görülüb.

“Azərbaycan Prezidenti İlham Əliyevin 2011-ci il 18 mart tarixli sərəncamla təsdiq etdiyi perspektiv inkişaf sxemi və 2011-2015-ci illərin Dövlət Proqramına uyğun olaraq, Bakı Metropoliteni 2030-cu ildə 5 xətt üzrə 76 stansiya və 5 elektrik deposundan ibarət olacaq. Dövlət Proqramı əsasında hazırda 23 stansiya və 1 elektrik deposu olan Bakı Metropoliteninin Bənövşəyi xəttinin inşası davam etdirilir. Tikintinin birinci beşillik planına görə, bu xəttin 5 stansiyası inşa olunacaq. 12 stansiyadan ibarət olacaq bu xətt Beynəlxalq Avtovağzal Kompleksindən başlamaqla Qaraçuxur qəsəbəsinə qədər uzanacaq.”-deyə N.Paşayev qeyd edib.Qurum rəsmisi bildirib ki, 356 metr uzunluğunda sahəni əhatə edən "Avtovağzal" stansiya kompleksi həm xaricdən, həm də daxildən son görkəmini almaqdadır. Burada 9 çıxış nəzərdə tutulub.Böyük bir ərazini əhatə edəcək stansiyada digər çıxışlar Biləcəri qəsəbəsinə və Bakı-Sumqayıt şosesinin hər iki istiqamətinə olacaq. Ölkə başçısının tapşırığına əsasən, yeni xətlər 7 vaqon üçün nəzərdə tutulacaq. Buna görə də stansiyalarda platformanın uzunluğu əvvəlkindən 42 m çox olacaq və 144 metr təşkil edəcək.