Bu layihə ABŞ Dövlət Departamentinin maliyyə dəstəyi ilə Beynəlxalq Miqrasiya Təşkilatının Azərbaycandakı Nümayəndəliyi tərəfindən həyata keçirilən "Azərbaycanda potensialların artırılması və texniki dəstək vasitəsilə insan alverinə qarşı mübarizənin səmərəliyi üçün əməkdaşlığın gücləndirilməsi – IV Faza” Layihəsi çərçivəsində reallaşıb. İctimaiyyət nümayəndələrinin, tələbə gənclərin, QHT və KİV təmsilçilərinin iştirak etdiyi tədbirdə "Xeberle.com” saytının redaktoru, layihənin əlaqələndiricisi Ramil Zeynallı layihənin mahiyyəti, məqsədləri barədə iştirakçılara ətraflı məlumat verib. O, bildirib ki, layihənin əsas məqsədi insan alveri və məcburi əmək qurbanlarını və potensial qurbanları maarifləndirmək, Sumqayıt şəhərində və regionda insan alveri ilə bağlı məlumatları toplamaq, araşdırmaq, nəticələr barədə məlumatlar dərc etmək, insan alverinə qarşı mübarizə sahəsində KİV-lərlə mərkəzi və yerli dövlət orqanları, bələdiyyələr arasında əməkdaşlığı inkişaf etdirmək, eləcə də jurnalistlərin yeni bilik və bacarıqlara yiyələnməsinə nail olmaqdır.

"Qadın Təşəbbüsü və Sosial Problemlərin Həllinə Yardım” İctimai Birliyinin sədri, psixoloq Zenfira Mustafayeva insan alveri qurbanlarının üzləşdiyi təcridetmə, psixoloji təzyiq problemlərindən bəhs edib, bu sahədə atılmalı olan addımlar barədə danışıb, təqdimatla çıxış edib.

Ekspert iştirakçılara insan alveri nədir və qabaqlayıcı tədbirlər nələrdən ibarətdir, həmçinin insan alverinə qarşı mübarizə haqqında qanunvericilik toplusu barədə məlumat verib. Ekspert, həmçinin insan alveri qurbanları kimlər ola bilər, əhali arasında maarifləndirmənin aparılma üsulları, insan alveri qurbanlarının sosial reablitasiyası və onların müdafiəsi, insan alveri qurbanlarının reinteqrasiyası haqqında iştirakçıları maarifləndirib. Z. Mustafayeva insan alveri qurbanı olmuş şəxslərin normal həyat tərzinə qaytarılmasında psixoloqların, hüquqşunasların, sosial işçilərin rolundan geniş danışıb, göstərilən xidmətlərin sayının və keyfiyyətinin artırılmasının vacibliyini bildirib.

Vurğulanıb ki, məhz buna görə qurbanların cəmiyyətə reinteqrasiyasında maarifləndirmə və sosial dəstək önəmlidir.