Sumqayıtın müasir görkəm alması, abadlaşdırılması və infrastrukturun yaxşılaşdırılması üçün ardıcıl tədbirlər görülür. Doğrudur, şəhərdə hələ həllini gözləyən, “əl gəzdirilməli” xeyli yerlər, problemlər var. Ancaq gəlin etiraf edək ki, Sumqayıt tutaq ki, iki il öncəki Sumqayıt deyil.

Şəhərin bir neçə mərkəzi küçələri boyunca binaların fasadları damları dəyişdirilib, yenilənib. Ancaq bu da faktdır ki, şəhərdə bir çox yaşayış binaları var ki, bu binalar ömrünü başa vurub: istər təhlükəsizlik baxımından, istərsə də görkəmləri etibarilə onlar müasir tələblərə cavab vermir. Məsələn, şəhərin “İnşaatçılar” qəsəbəsində bir neçə taxta bina sovetlərin qalığı olaraq hələ də yaşayır. Ancaq, nəinki onların bugünkü tələblərə cavab vermədiyindən danışmağa dəyməz, hətta bu binaların təhlükəsizliyi də müzakirə predmeti ola bilər.

Şəhərin Heydər Əliyev prospektində də bu cür taxta binalar ötən həftəyə qədər bizimlə idilər. Prospektin sol çiyni boyunca uzanıb gedən taxta iki-üç mərtəbəli binalar da yuxarıda bəhs etdiyimiz iki faktordan dolayı arxivə qovuşmalı idi – necə ki, bu, baş verir. Hazırda 17-18-ci məhəllələrdə yerləşən 4 taxta binanın sökülərək, yerində hündürmərtəbəli yaşayış binalarının tikilməsi istiqamətində iş aparılır. Artıq köhnə binalar sökülüb, yaxın günlərdə isə yeni binaların tikintisinə başlanacaq.

17-ci məhəllədəki hündürmərtəbəli binanı “Ayta – lider” şirkəti tikir. 19-cu məhəllədəki bina isə “Turan” tikinti şirkəti tərəfindən tikilir. Layihələr barədə daha ətraflı məlumatlar almaq üçün hər iki tikinti sahəsində olduq.

19-cu məhəllədə qazma işini aparan və özünü qazıntı işinin rəhbəri kimi təqdim edən şəxs layihə barədə məlumatlı olmadığımı desə də, digər məhəllədəki bina barədə tikintini aparan “Lider – Ayta” Mənzil Tikinti Korporativindən məlumat ala bildik.

Korporativin sədri Nazim Quliyev yeni bina barədə bunları dedi:

-         Sumqayıtda bu gün sürətli, heyranedici dəyişikliklərə şahidlik edirik. 50-60-cı illərdə tikilmiş binaları müasirləşdirmək lazımdır -  buna görə də İcra Hakimiyyəti tərəfindən həmin binalara modern fasadlar çəkilir.

Bizim yerində hündürmərətəbəli bina tikəcəyimiz bina isə olduqca köhnə, ömrünü başa vurmuş taxta tikili idi. Tikəcəyimiz bina kimisi Sumqayıtda yoxdur. Pəncərələr nüfuzlu türk şirkətinin- “Adapen”indir, qapılar isə davamlı və gözəl qapılar olacaq. Neçə binada olmuşuq, hər mənzilin bir cür qapısının olduğunu görmüşük. Bu, nədən irəli gəlir? Tikinti şirkəti elə qapı qoyur ki, evi alan adam qapını dəyişmək məcburiyyətində qalır. Və yaxud pəncərəni dəyişməli olur.  

Liftlərimiz də Sumqayıt üçün yeni olacaq: artıq sürətli liftlər dövrüdür. İyirmi birinci əsrdə yaşayırıq. Yəqin ki, “Mitsubishi” liftləri olacaq.

Bəzən işıqlar sönəndə binalar, yaşayışçılar saatlarla işıqsız qalırlar.  Belə halda həmin evdə qalan körpəni anası necə qidalandırsın, isitsin?! Bizim tikdiyimiz binalarda transformatorlar quraşdırılır və 3 saniyə sonra bu qurğular işə düşür.

Bina çox gözəl görkəmdə olacaq, 8-9 ballıq zəlzələlərə davamlı inşa olunacaq. Binada hər blokda iki ədəd lift olacaq. Bir lift yük daşımaq üçün, biri isə insanlar üçün nəzərdə tutulacaq. İki bloklu, hər blokda  90 mənzilli, 15 mərtəbəli bina olacaq. Hər mərtəbədə 2 birotaqlı,  2 ikiotaqlı və 2 üçotaqlı mənzillər olacaq. Birinci mərtəbədə satış sahəsi nəzərdə tutulub - yəni mağazalar filan. Liftlər zirzəmiyə - yəni avtodayanacağa qədər düşəcək. Binanın həyətinin hər tərəfi bağlı olacaq, gözətçilər giriş-çıxışa nəzarət edəcək. İnşallah, 1il ərzində bu dediklərimizi həyata keçirəcəyik.

- “Lider – Ayta” şirkəti barədə qısaca məlumat vermənizi istərdik. Şirkət bundan öncə nə kimi işlər görüb?

- Tikinti şirkəti tikinti apardığı yerdə qalmalıdır. Çünki həmin binanın problemlərinə görə biz məsuliyyət daşıyırıq. Mənzilləri alan vətəndaşlar da avtomatik bizim sərmayədarlara çevrilirlər, biz icraçıyıq. Sabah şirkətin sədri, rəhbərliyi dəyişə bilər, ancaq şirkət tikinti apardığı yerdə qalmalıdır. Bundan öncə tərəfimizdən Bakıda 7-8 bina tikilib, artıq səkkizinci bitirmək üzrəyik. Sumqayıtda isə bu, birinci işimizdir. Ancaq deyim ki, “Lider – Ayta” şirkəti Sumqayıt şəhərində qalacaq.

- Köhnə binaların sakinləri kompensasiyadan razı qalıblarmı?

- Çox razı qalıblar. Sizə deyim ki, Sumqayıtda belə bir məbləğ heç vaxt verilməyib. 65 min manat iki otağa, 75 min manat üç otağa görə kompensasiya təklifimiz birmənalı olaraq hanı tərəfindən qəbul edildi. Biz bir çoxunun banklarla olan problemini həll etdik, müxtəlif cür yardım etməyə çalışdıq, nəhayətdə isə təbii ki, razılıqla ayrıldıq.

- Müvafiq qurumların tikinti icazəsi texniki şərtlər və s. qaydasındadırmı?

- Dövlətimizdən inciməyə haqqımız yoxdur. Bütün qurumlar çox gözəl səviyyədə fəaliyyət göstərirlər. Məsələn, Fövqəladə Hallar Nazirliyi 10 günlük yoxlamalardan sonra heç bir problem olmadığını bildirdi, dövlət rüsumlarını ödədik və sənədləşdirmə aparıldı. Su, işıq, qaz, istiliklə bağlı məsələlər də həllini tapıb. Bütün texniki sənədlər qaydasındadır, tikintinin başlanması üçün heç bir problem yoxdur.

 -Əldə etdiyimiz məlumata görə şəhərin daha bir neçə yerində köhnə, yaşayış üçün vaxtı keçmiş, xüsusilə taxtadan tikilmiş binaları yeni hündürmərtəbəli binalar əvəz edəcək. Hazırda əlaqədar strukturlar tikinti şirkətlərinin şəhərimizdə tikinti işləri  aparmaları üçün cəlb etmək istiqamətində işləyirlər.

Şəhərə axının artması da yeni binaların tikintisini stimullaşdırır.

Belə vəziyyətdə Sumqayıtda mənzillərn qiymətlərinin də artacağı asan proqnoza gəlir. Amma hər halda köhnə və təhlükəli binaların yerində tikiləcəy hündürmərtəbəli binalar həm də şəhərimizi gözəlləşdirəcək.

 Vüsal
168saat.com