“Hər bir insan üçün vətən onun doğulduğu yerdən başlayır. Sumqayıt mənim ikinci vətənimdir. Həyatımın əsas hissəsi bu şəhərdə keçib və nə qədər ömrüm varsa burda keçəcək. Sumqayıtlıları bu günki bayram münasibətilə təbrik edirəm”.

Analitik az xəbər verir ki, bu sözləri Sumqayıtın 65 illiyi ilə bağlı “Şəhər bayramı”nda iştirak edən Baş nazirin müavini Əli Həsənov jurnalistlərə açıqlamasında bildirib. Özünü sumqayıtlı kimi xarakterizə edən Baş nazirin müavini qeyd edib ki, Sumqayıtın keçmiş ənənələrinin bərpa olunduğunu görəndə hər bir sumqayıtlı fərəh hissi keçirir. O, SSRİ dövründə şəhərin mərkəzləşmiş siyasətin qurbanına çevrildiyini də deyib: “SSRİ dağılanda bəlli oldu ki, Sumqayıt xammal istehsal edirmiş. Bütün istehsalat dayandı. Bu da SSRİ-nin iyrənc siyasətindən biri idi ki, əvvəlcədən planlaşdırılmışdı”.

 Ə. Həsənov vurğulayıb ki, bu gün Sumqayıt ölkənin ən gözəl şəhərinə çevrilib. Baş nazirin müavini Sumqayıtın ən böyük sərvətinin onun insanları olduğuna diqqət çəkib: “Sumqayıtın insanları çox fərqlidirlər. Həm mehribançılıqlarına, həm qayğışekliklərinə, həm də insanpərvərliklərinə görə. Sumqayıtlı kimi öz adımdan, hökumət nümayəndəsi kimi şəhər rəhbərliyini və sumqayıtlıları təbrik edirəm.”