Təhsil nazirliyi pulun olmadığını deyir 

"Məktəb avtobusu" deyəndə ilk növbədə Amerika filmlərindən böyük sarı avtobusları xatırlayırıq. Xarici ölkələrdə şagirdlərin avtobusla məktəblərə çatdırılması təəccüblü deyil. Uzağa getməyək, elə yaxın qonşumuz Türkiyədə də məktəblərə şagirdləri avtobuslar gətirib aparır. İnkişaf etmiş ölkələrdə artıq illərdir bu sistem tətbiq olunur. Və öz səmərəsini də göstərir.

 Belə ki, məktəblərə aid servis avtobuslarının şagirdləri dərsə aparıb gətirməsi təkcə valideyni bu işdən azad etmir, həm də şəhərin nəqliyyat sistemində problemə çevirilən tıxacın qarşısını alır. Eyni zamanda bunun mənəvi-psixoloji tərəfləri də var. Yəni uşaqlar kimin dərsə hansı "inomarka" ilə gəldiyini görmür... 

 Hazırda Azərbaycanda bir neçə özəl bağça və məktəblər istisna olunmaqla, təhsil sistemində servis avtobusları yoxdur. Ümumiyyətlə, belə bir sistemin dövlət məktəb və bağçalarında yaradılması haqqında düşünülürmü? Bu və digər suallarla Təhsil Nazirliyinə müraciət etdik. Nazirliyin şöbə müdiri Cəsarət Valehov bildirdi ki, hazırda ölkədə 4500 məktəb var ki, bunun da 357-si Bakı şəhərindədir: “Bu xidmətlər özəl məktəblərdə var. Təhsil Nazirliyinin tabeliyində olan orta məktəblərə gəldikdə isə, avtobus xidmətlərinin təşkili ilə bağlı məsələ açıq alır. Bu xidmət kifayət qədər maliyyə tələb edən məsələdir. Bunun üçün maliyyə resursları tapmaq lazımdır”.

 Qeyd edək ki, hazırda Azərbaycan iqtisadiyyatı sürətli inkişaf dövrünü yaşayır. Bu mənada dövlətimizin əsas məqsədi ölkə vətəndaşlarının sosial problemlərini həll etmək, heç olmazsa onları kifayət qədər azaltmaqdır. Təhsil sistemində avtobus servislərinin tətbiq olunması isə həm də eyni vaxtda bir neçə problemin həll edilməsi deməkdir. Mövzuya qayıdacağıq.

 R.ZEYNALLI, Analitik.az