“Mənim ən böyük arzum ömrüm boyunca vətən üçün əvəzedilməz işlər görərək bir gün Azərbaycanın Fəxri xiyabanında dəfn edilməkdir”. Bu sözləri Sumqayıtın 65 illiyi münasibətilə şəhərin mədəni və ictimai həyatında fəal iştirakına görə Sumqayıt Şəhər İcra Hakimiyyətinin başçısı tərəfindən Fəxri fərmanla təltif edilən Elvin Dadaşov deyib. E.Dadaşov yaxşı vətəndaş olmağın yollarından danışıb: “Yaxşı vətəndaş olmaq xüsusi iş görmək, bu mövzuda əsər yazmaq və ya çıxış etmək demək deyil. Yaxşı vətəndaş olmaq üçün öz işini artıqlaması ilə görmək kifayət edər. Bu ölkə 10 milyon zərrəciyə bölünmüş bir konstruksiyadır sanki. Zərrəciyin hər biri keyfiyyətli olduqda ümumi konstruksiya möhkəm və davamlı olur. İstər oxuduğum, inkişaf etdiyim zamanlarda, istərsə də işimi qurduğum dövrlərdə maksimum nəticə üçün çalışdım. Öz işimin ən yaxşısı olmağa çalışdım.”

Haşiyə.
Elvin Vaqif oğlu Dadaşov 1990-cı ildə Quba rayonunun Susay kəndində anadan olub. Məktəb illərini Susay kənd orta məktəbində, Quba Texniki Təmayüllü Liseyində və son 2 ili Sumqayıt şəhər Təbiət Elmləri Təmayüllü Gimnaziyasında keçirib. 2008-ci ildə qəbul imtahanlarında 700 bal nəticə ilə Azərbaycan Respublikası Prezidenti yanında Dövlət İdarəçilik Akademiyasına qəbul olub. Göstərdiyi nəticəyə görə Prezident təqaüdünə və Prezidentin şəxsi göstərişi ilə ikiotaqlı mənzilə layiq görülüb. Universitet illərində Elvin müxtəlif yarış və çempionatlarda, eləcə də ictimai işlərdə fəallığına görə onlarla diplom, sertifikat və fəxri fərmanla mükafatlandırılıb. Marketinq, menecment, jurnalistika, təlimçilik sahələrində işləyib. Hərbi xidmətdən sonra isə "Best Friends" adlı Karyera və Təhsil mərkəzini təsis edib. Bir il sonra "Panda School" adlı ikinci Məktəbəqədər Hazırlıq Bağçasının əsasını qoyub.

E.Dadaşov təhsildə göstərdiyi yüksək nəticəyə görə 2008-ci ildə Prezident İlham Əliyev tərəfindən təqaüd və Sumqayıt şəhərində ikiotaqlı mənzil ilə təmin edildiyini də vurğulayıb: “Prezident təqaüdü və ikiotaqlı mənzillə mükafatlandırılmam dövlətin elmə verdiyi dəyərin göstəricisidir. Bu məndə iftixar, qürur və bu ölkə ilə fəxr etmək hissini daha gücləndirib”.

O,  Sumqayıt şəhər İcra Hakimiyyətinin başçısı Eldar Əzizov tərəfindən təltif olunmasının gələcək fəaliyyətinə daha da stimul verdiyini qeyd edib: “Şəhərin mədəni və ictimai həyatında xidmətlərimə görə Fəxri fərmanla mükafatlandırılmam təhsil sahəsində qurduğum biznesdə daha möhkəm durmağa, bu şəhər və bu ölkə üçün daha böyük əzmlə çalışmağa həvəsləndirir. Təltifi almaq üçün səhnəyə çıxarkən minlərlə insanın üzündə təbəssüm gördüm. Doğma şəhərin insanlarının qarşısında bu cür adı almaq çox böyük şərəf idi. Bu həyatımın ən gözəl günlərindən biri idi.”

E. Dadaşov təltifə görə  Eldar Əzizova minnətdar olduğunu da sözlərinə əlavə edib.

Ramil Zeynallı
Xeberle.com

P.S. Qeyd edək ki, E.Dadaşovun həyatında mühüm hadisə də baş verib. O dünən nişanlanıb. Xeberle.com adından Elvinə xoşbəxtlik arzu edirik!