Xeyriyyəçi qrup xeyli müddətdir ki maddi sıxıntılarla üzləşmiş ailənin görüşünə xeyirxahlıq, mərhəmət missiyası ilə gedərək, özləri ilə müəyyən müddət ailənin ehtiyacını ödəyə biləcək ərzaq məhsulları aparmış, azyaşlı 5 uşağın hər birinə xeyli yay-qış paltarları, ayaqqabılar, məktəb ləvazimatları, oyuncaqlar və s. hədiyyə etmişdir.

Böyüyünün 10, ən kiçiyinin isə iki yaçı olan uşaqlar gözlənilməz qonaqların özləri kimi də gözlənilməz olan hədiyyələrinə görə sevinclərini gizlətməmiş, Od çərşənbəsi bayramında onları yad etmiş "dayılara və xalalara" öz sevincli baxışları, gülüşləri ilə minnətdarlıq etmişlər.

- Düzünü deyim ki, həmişə diqqətə, qayğıya ehtiyacı olan adamları - tənha qocaları, kimsəsiz, yetim uşaqları, imkansız ailələri araylb-axtararaq, ictimaiyyətin diqqətini onlara cəlb etməyə çalışan "Xeberle.com" saytının bir-neçə gün əvvəl öz səhifəsində həyəcan təbili kimi verdiyi "Həyatla ölüm-dirim mübarizəsi aparan sumqayıtlı ailənin acınacaqlı həyatı” adlı məqalə və ailənin ağır həyatını əks etdirən foto-şəkillər məni və kollektivimizi çox sarsıtdı, - deyə Azərbaycan "Qızıl Aypara" Cəmiyyətinin Sumqayıt bölməsinin müdiri Mətanət xanım Məhərrəmova bu ailəyə diqqətin hardan irəli gəldiyini bildirir. - Axı, necə biganə qalmaq olar bu ailəyə? Beş oğlan uşağı böyüyən bu azərbaycanlı ailəsində ata da, ana da işsizdir.

Bunu deyən Mətanət xanımın gözlərində qeyri-ixtiyari yaş gilələnir. Həmişə kimsəsizlərin harayına yetən, bacardığı köməyi onlardan heç vaxt əsirgəməyən "Aypara" rəhbəri şəraitsiz bir daxmada böyüyən uşaqları bir ana kimi bağrına basıb, öpür və gətirdikləri paltarları uşaqlara özü şəxsən geyindirib, təsəlli tapır, 3 yaşlı Elvinin və ailənin sonbeşiyi - 2 yaşlı Hüseynin isə oyuncaqlara görə necə sevindiklərini görüb, fərəhini gizlədə bilmir. Mətanət xanımın "könüllülər" dəstəsi də ona kömək edir, uşaqlara qayğıkeşliık göstərirlər.

Təəssüflə qeyd etmək lazımdır ki, "Xeberle.com" saytının "SOS" həyəcanlı xəbərində də bildirildiyi kimi, maddi ehtiyac üzündən ailə başçısı, 36 yaşlı Elman Şəfizadə böyük oğulları - 10 yaşlı Tofiq, 9 yaşlı Emil və 7 yaşlı Elvinlə ordan-burdan, hətta zibilliklərdən polietilen kisələr, karton və şüşə qablar yığıb sataraq, bu yolla da olsa, ailənin ən mühüm ehtiyaclarını ödəmək, çörək pulu əldə etmək məcburiyyətindədir. Diqqətəlayiqdir ki, özləri yetim, kimsəsiz olan ata-ana, bütün çətinliklərə, neçə aydır ki kirayədə yaşamaqlarına baxmayaraq (aylıq haqqı 80 manat olan kirayə pulunu da hələlik ödəyə bilmirlər. Lakin özü də kasıbçılıqla yaşayan, həmin gün "qonşu"larına köməyə gələn "ayparaçıları" həyətin doqqazındaca gülərüzlə, sevinclə qarşılayan ev sahibəsi Solmaz xanım sağ olsun ki, bu ailənin acınacaqlı vəziyyətini nəzərə alıb, onları evdən çıxartmır), gələcəkdə Vətənin əskəri olacaq 5 oğulu uşaq evlərinə verməyib, özləri böyütməyə çalışırlar. İnanırlar ki, onları - valideynləri işlə təmin edə biləcək xeyirxah adamlar tapılacaq və onların ailəsi maddi sıxıntı və çətinliklərdən, nəhayət, xilas ola biləcəklər.

Ailənin bir problemi də odur ki, uşaqlardan üçü - Tofiq, Emil və Elvin məktəb yaşlarında olsalar da, təhsildən kənarda qalıblar. Yalnız yaşıdları 4-cü sinifdə oxuyan 10 yaşlı Tofiq birinci sinfi qurtarıb, o birilər isə indiyə kimi hələ məktəbə getməyiblər.

Ona görə də Mətanət xanım və "Xeberle.com" öz qayğıkeşlik missiyasını davam etdirərək, uşaqların təhsilə cəlb olunması, balaca Şəfizadələrin yeni tədris ilindən etibarən məktəbə götürülmələri üçün qəsəbədəki ən yaxşı, nümunəvi məktəblərdən olan 6 N-li məktəbin rəhbərliyi ilə də görüşməyi qərarlaşdılar. Məktəbin direktoru İradə Məmmədova ilə danışıqdan sonra problemin həll olunacağına şübhə qalmadı. Bunun üçün uşaqların müvafiq sənədlərinin hazırlanması gərəkdir ki, bunu da Mətanət xanım və İradə müəllimə məmnuniyyətlə öz üzərilərinə götürdülər.

Bu cür diqqət və qayğıdan, mehriban, səmimi münasibətdən fərəhini gizlətməyən gənc ana - Natəvan xanım ailəsinə maddi və mənəvi yardım olduqlarına görə bu xeyirxah adamlara dərin minnətdarlığını, təşəkkürünü bildirdi:

- Vallah, söz tapa bilmirəm. Bizi yada salıb, əl tutduğunuza görə çox sağ olun, var olun. Düz deyiblər ki, dünya yaxşı adamlardan xali deyil...

Şəfizadələr üçün isə yaxşı adamlar kimi həmin gün "Qızıl Aypara" Cəmiyyətinin Sumqayıt bölməsinin və "Xeberle.com"un kollektivi, o cümlədən ailə haqqında həyəcan və qayğı dolu bir "SOS" siqnallı yazı hazırlamış Fərqanə Abdulova,Leyla İlqar və fotomüxbir Kamran Kazımzadə daha çox yadda qaldı.

Ancaq heç şübhə yoxdur ki, Şəfizadələr üçün yaxşı adamların sayı bundan sonra daha da çoxalacaq və ailənin başçıları işlə, uşaqlar isə təhsillə və uşaq baxçasında yerlə təmin olunacaqlar.

Yaxşı adamlar, bir addım irəli!

Rəhman ORXAN.